ဂါနာနဲ့ပွဲမှာ ပြိုင်ဘက်တွေ တောင့်မခံနိုင်တဲ့ ကစားအားမျိုးနဲ့ ကစားကြဖို့ အင်္ဂလန်အသင်းကို ရက်ရှ်ဖို့ဒ် တိုက်တွန်း
အင်္ဂလန်တိုက်စစ်မှူး မားကပ်စ်ရက်ရှ်ဖို့ဒ်က လာမယ့်အင်္ဂါနေ့ (ဇွန်လ ၂၃ ရက်) မှာ ကစားမယ့် ဂါနာအသင်းနဲ့ ပွဲစဉ်မတိုင်ခင်မှာ ပြိုင်ဘက်တွေ တောင့်မခံနိုင်လောက်တဲ့ ကစားဟန်အရှိန်အဟုန်မျိုးနဲ့ ကစားကြဖို့ သူ့ရဲ့အသင်းကို တိုက်တွန်းလိုက်ပါတယ်။ အင်္ဂလန်အသင်းဟာ အဖွင့်ပွဲစဉ်မှာ ခရိုအေးရှားကို ၄-၂ ဂိုးနဲ့ အထင်ကြီးလောက်စရာ အနိုင်ရရှိခဲ့ပြီးနောက် အခု ဂါနာနဲ့ပွဲမှာသာ ထပ်မံအနိုင်ရရင် ၃၂ သင်းအဆင့်ကို တက်ရောက်နိုင်ဖို့ အခွင့်အရေးရှိနေတာပါ။ ခရိုအေးရှားနဲ့ပွဲမှာ လူစားဝင်ကစားပြီး စတုတ္ထမြောက်နဲ့ နောက်ဆုံးအနိုင်ဂိုးကို သွင်းယူပေးခဲ့တဲ့ ရက်ရှ်ဖို့ဒ်က "Black Stars" လို့ အမည်ပြောင်ရထားတဲ့ ဂါနာအသင်းနဲ့ပွဲမှာ ကစားအားကို ပိုမြှင့်တင်ကြဖို့ တိုက်တွန်းခဲ့တာ ဖြစ်ပါတယ်။ တနင်္လာနေ့က အင်္ဂလန်ဘောလုံးအဖွဲ့ချုပ် (FA) နဲ့ တွေ့ဆုံရာမှာ သူက "ကျွန်တော်တို့အနေနဲ့ သူတို့ တောင့်မခံနိုင်တဲ့ ကစားအားမျိုးနဲ့ ကစားရမှာဖြစ်သလို အဲဒီအတိုင်းဖြစ်အောင်လည်း အမြဲထိန်းထားနိုင်ဖို့ ကြိုးစားရမှာပါ။ အဲဒီလိုအဆင့်မျိုးနဲ့သာ ကစားနိုင်မယ်ဆိုရင် ပွဲတွေကို အနိုင်ရရှိနိုင်ပါတယ်။ ကျွန်တော်တို့ ကြိုတင်ခန့်မှန်းနိုင်တဲ့ တစ်ခုတည်းသော အရာကတော့ မိနစ် ၉၀ ဒါမှမဟုတ် မိနစ် ၁၂၀ အတွင်းမှာ ကျွန်တော်တို့ ဘယ်လိုပုံစံနဲ့ ယှဉ်ပြိုင်သွားမလဲဆိုတာပဲ ဖြစ်ပါတယ်။ ဒါကြောင့် ကစားသမားတွေအနေနဲ့ အဲဒီအချက်ပေါ်မှာပဲ အာရုံစိုက်ထားရမယ်လို့ ကျွန်တော်ထင်ပါတယ်။ ကျွန်တော်တို့ကိုယ်တိုင်လည်း အစွမ်းကုန် ဆက်ပြီး ကြိုးစားနေရမှာဖြစ်သလို ကျွန်တော်တို့မှာ အဲဒီလို လုပ်နိုင်စွမ်းလည်း အသေအချာ ရှိပါတယ်" လို့ ပြောကြားခဲ့ပါတယ်။
