ရီးရဲလ်မက်ဒရစ်အသင်းရဲ့ ဥက္ကဋ္ဌလောင်း အင်းနရစ် ရီကွယ်လ်မီက အကယ်၍ သူသာ ရွေးကောက်ပွဲမှာ အနိုင်ရခဲ့ရင် မန်စီးတီးရဲ့ အမာခံတိုက်စစ်မှူး အာလင်း ဟာလန်းကို ခေါ်ယူပေးမယ်လို့ သူ့ရဲ့ ကတိကဝတ်စာရင်းထဲမှာ ထည့်သွင်းလိုက်ပါတယ်။

အသက် ၃၇ နှစ်အရွယ်ရှိပြီဖြစ်တဲ့ ရီကွယ်လ်မီဟာ လာမယ့် ဇွန်လ ၇ ရက် (တနင်္ဂနွေနေ့) မှာ ပြုလုပ်မယ့် ရွေးကောက်ပွဲမှာ လက်ရှိဥက္ကဋ္ဌ ဖလော်ရန်တီနို ပီရက်ဇ်ကို စိန်ခေါ်မယ့်သူအဖြစ် ပေါ်ထွက်လာခဲ့တာပါ။

ရီကွယ်လ်မီဟာ အသင်းဥက္ကဋ္ဌနေရာကို လွှဲပြောင်းရယူနိုင်ဖို့အတွက် စိတ်လှုပ်ရှားစရာကောင်းတဲ့ ကတိကဝတ်တချို့ကို ပေးထားခဲ့ပြီး အဲဒီထဲမှာ ရိုဒရီကို ခေါ်ယူဖို့နဲ့ ဟိုဆေးမော်ရင်ဟိုကို နည်းပြသစ်အဖြစ် ခန့်အပ်မှာမဟုတ်ဘူးဆိုတဲ့ အချက်တွေ ပါဝင်ပါတယ်။

El Hormiguero အစီအစဉ်မှာ စကားပြောကြားစဉ်အတွင်း သူက မန်စီးတီးတိုက်စစ်မှူး ဟာလန်းကိုလည်း သူ့ရဲ့စာရင်းထဲ ထည့်သွင်းလိုက်ပြီး ဟာလန်းရဲ့ စာချုပ်ထဲမှာ စာချုပ်ဖျက်သိမ်းကြေး (release clause) ပါဝင်သလို ကစားသမားကိုယ်တိုင်ကလည်း ပြောင်းရွှေ့ဖို့ စိတ်အားထက်သန်နေတယ်လို့ ဆိုပါတယ်။ သူဟာ ရုပ်သံအစီအစဉ်မှာ စာရွက်စာတမ်းတစ်ခုနဲ့အတူ ပေါ်လာခဲ့ပြီး အဲဒီအကြောင်းကို အခုလို ရှင်းပြခဲ့ပါတယ်။ "ကျွန်တော် ကတိပြုထားတဲ့ ကစားသမားနှစ်ယောက်နဲ့ ပတ်သက်ပြီး အကယ်၍ ကျွန်တော်သာ ရီးရဲလ်ဥက္ကဋ္ဌ ဖြစ်လာခဲ့လို့ ပေးထားတဲ့ကတိတစ်ခုခုကို မတည်နိုင်ခဲ့ရင် လာမယ့်ရာသီမှာ ရီးရဲလ်အသင်းဝင် ၁၀၀,၀၀၀ စလုံးရဲ့ အသင်းဝင်ကြေး ၁၀၀ ရာခိုင်နှုန်းလုံးကို ကျွန်တော်ကိုယ်တိုင် ပေးချေသွားမယ်ဆိုတဲ့ ရှေ့နေရှေ့ရပ် လက်မှတ်ပါတဲ့ အာမခံချက်ကို ကျွန်တော် လက်မှတ်ရေးထိုးထားပါတယ်" လို့ ပြောကြားခဲ့ပါတယ်။

ဒါ့အပြင် ရီကွယ်လ်မီက "ဟာလန်းရဲ့ စာချုပ်ထဲမှာ စာချုပ်ဖျက်သိမ်းကြေး တစ်ခုပါဝင်နေပြီး သူက ရီးရဲလ်မက်ဒရစ်မှာ ကစားချင်နေတာပါ" လို့လည်း ဆက်လက်ပြောကြားခဲ့ပါတယ်။