အင်တာမီလန်ကို ပြောင်းရွှေ့တော့မယ့်အကြောင်း ဆိုရှယ်မီဒီယာပေါ်မှာ အရိပ်အယောင်ပြလာတဲ့ လီဗာပူးကွင်းလယ်လူ ကာတစ်ဂျုံးစ်
လီဗာပူးကွင်းလယ်လူ ကာတစ်ဂျုံးစ်ရဲ့ ဆိုရှယ်မီဒီယာလှုပ်ရှားမှုတွေကြောင့် သူဟာ အင်တာမီလန်အသင်းကို ပြောင်းရွှေ့တော့မယ်ဆိုတဲ့ ကောလာဟလတွေ ပိုပြီးအရှိန်မြင့်လာခဲ့ပါတယ်။ အသင်းကို တစ်ကျော့ပြန် အပြောင်းအလဲတွေလုပ်ဖို့ ရန်ပုံငွေရှာဖွေတဲ့အနေနဲ့ လီဗာပူးအသင်းဟာ ဒီနွေရာသီမှာ ဂျုံးစ်ကို ရောင်းချဖို့ ပြင်ဆင်နေတယ်လို့ သတင်းတွေ ထွက်ပေါ်နေတာပါ။ အသက် ၂၅ နှစ်အရွယ်ရှိပြီဖြစ်တဲ့ ဂျုံးစ်ဟာ အသင်းရဲ့ ပထမအသင်းလူစာရင်းမှာ ပုံမှန်နေရာရဖို့ ရုန်းကန်နေရပြီး ပရီမီယံလိဂ် ၃၁ ပွဲမှာ ၁၅ ပွဲသာ ပွဲထွက်ကစားသမားအဖြစ် ပါဝင်ခွင့်ရခဲ့တာ ဖြစ်ပါတယ်။ CalcioMercato ရဲ့ ဖော်ပြချက်အရ အင်တာမီလန်အသင်းဟာ ဂျုံးစ်ကို ခေါ်ယူဖို့ စိတ်ဝင်စားနေပြီး ပြောင်းရွှေ့ကြေး ယူရို ၁၀ သန်းကနေ ၁၅ သန်းဝန်းကျင်လောက်နဲ့တင် ခေါ်ယူနိုင်လိမ့်မယ်လို့ ယူဆနေကြပါတယ်။ ဂျုံးစ်ဟာ လတ်တလော စီးရီးအေ ချန်ပီယံဆုကို ဆွတ်ခူးထားတဲ့ အင်တာမီလန်အသင်းရဲ့ ကစားသမား မားကပ်စ်သူရမ်ရဲ့ အောင်ပွဲခံ အင်စတာဂရမ်ပို့စ်ကို Like ပေးခဲ့တာကြောင့် သူဟာ အီတလီကလပ်ဆီ ပြောင်းရွှေ့တော့မယ်ဆိုတဲ့ ခန့်မှန်းချက်တွေ ပိုပြီး အရှိန်တက်လာခဲ့တာ ဖြစ်ပါတယ်။ အင်္ဂလန်လက်ရွေးစင်ကစားသမား ဂျုံးစ်နဲ့ လီဗာပူးအသင်းတို့ချုပ်ဆိုထားတဲ့ စာချုပ်သက်တမ်းဟာ ၂၀၂၇ ခုနှစ် နွေရာသီမှာ ကုန်ဆုံးမှာ ဖြစ်ပါတယ်။
