ချန်ပီယံလိဂ်ဆီမီးဖိုင်နယ်မှာ အက်သလက်တီကိုမက်ဒရစ်ကို အနိုင်ယူခဲ့တဲ့ အာဆင်နယ်အသင်းရဲ့အောင်ပွဲကို သူ့ရဲ့သက်တမ်းတစ်လျှောက် အကောင်းဆုံးအခိုက်အတန့်တွေအနက် တစ်ခုဖြစ်တယ်လို့ အာတီတာက ပြောဆိုလိုက်ပါတယ်။

ဒီပွဲစဉ်ရဲ့ပထမပိုင်းပြီးဆုံးခါနီးမှာ ဆာကာက အဆုံးအဖြတ်အနိုင်ဂိုးကို သွင်းယူပေးခဲ့လို့ အမ်းမရိတ်စ်ကွင်းမှာ အာဆင်နယ်က ၁-၀ ဂိုးဆိုတဲ့ရလဒ်ဖြင့် အနိုင်ရရှိခဲ့ပါတယ်။

ဒါကြောင့် ဂန်းနားတွေက နှစ်ကျော့ပေါင်းရလဒ် ၂-၁ ဂိုး ဆိုတဲ့ရလဒ်ဖြင့် နှစ် ၂၀ အတွင်း ပထမဆုံးအကြိမ် ချန်ပီယံလိဂ်ဗိုလ်လုပွဲဆီ တက်လှမ်းနိုင်ခဲ့ပါတယ်။

လာမယ့်မေ ၃၀ ရက်၊ ဗိုလ်လုပွဲမှာ ပီအက်စ်ဂျီ သို့မဟုတ် ဘိုင်ယန်မြူးနစ်နဲ့ရင်ဆိုင်ရမယ့် အာတီတာက အသင်းရဲ့သမိုင်းဝင်ခြေစွမ်းကို အခုလိုပဲ ချီးကျူးစကားပြောကြားခဲ့ပါတယ်။

"ဒါက ကျွန်တော့်ရဲ့ကစားသမားနဲ့ နည်းပြသက်တမ်းတစ်လျှောက် အကောင်းဆုံးညတွေအနက် တစ်ခု ဖြစ်ပါတယ်" လို့ ပွဲအပြီးမှာ သူက ပြောပါတယ်။

"ဒီနေ့မှာ ပရိသတ်တွေက သူတို့ရဲ့အားပေးမှုအဆင့်အတန်းကို မြှင့်တင်ပြသွားခဲ့ပြီး ကျွန်တော်တို့ ဒီပွဲကို ဘယ်လိုပုံစံနဲ့ ကစားရမလဲဆိုတာကို လမ်းညွှန်ပေးခဲ့ကြတယ်လို့ ထင်ပါတယ်။ အသင်းကို ကွင်းအပြင်ဘက်မှာ ကြိုဆိုခဲ့ကြတဲ့ပုံစံမျိုးကတော့ တကယ့်ကို ထူးခြားလွန်းပြီး ကျွန်တော် တစ်ခါမှမမြင်ဖူးခဲ့တဲ့ မြင်ကွင်းမျိုးပါပဲ။ ဒီနေ့ ကွင်းထဲမှာဖြစ်ပေါ်ခဲ့တဲ့ အားအင်တွေကလည်း တကယ်ကို ထူးခြားဆန်းသစ်လွန်းပါတယ်။ အဲဒီအားအင်တွေက လူတိုင်းရဲ့ယုံကြည်ချက်၊ ခွန်အားနဲ့ စိတ်အားထက်သန်မှုတွေကို မြှင့်တင်ပေးခဲ့တာမို့ ကျွန်တော် တကယ်ဂုဏ်ယူမိပါတယ်"

"ဒီအဆင့်ကိုရောက်ဖို့ နှစ်ပေါင်းများစွာ စောင့်ဆိုင်းခဲ့ရပြီး ဒါက အသင်းသမိုင်းမှာ ချန်ပီယံလိဂ်ဗိုလ်လုပွဲကို ဒုတိယအကြိမ်မြောက် တက်လှမ်းနိုင်ခြင်း ဖြစ်ပါတယ်။ တစ်ခါတလေကျရင် ဒီအလုပ်ကို ဘာကြောင့်လုပ်နေမိလဲဆိုတာတောင် စဉ်းစားမရနိုင်လောက်အောင်ကို ရူးသွပ်စရာကောင်းလွန်းပါတယ်။ ဒါပေမဲ့ ဒီနေ့မှာ ပရိသတ်တွေ၊ ကျွန်တော့်ရဲ့ကစားသမားတွေနဲ့ ဝန်ထမ်းတွေရဲ့မျက်နှာပေါ်က ပျော်ရွှင်ကြည်နူးမှုတွေနဲ့ သူတို့ဆီက ထွက်ပေါ်လာတဲ့ အလင်းရောင်တွေကို မြင်တွေ့လိုက်ရချိန်မှာတော့ ကျွန်တော်တို့ လုပ်ဆောင်သမျှ အရာအားလုံး အဓိပ္ပာယ်ရှိသွားခဲ့ပါတယ်" လို့ အာတီတာက ပြောကြားခဲ့ပါတယ်။