ယူနိုက်တက်အတွက်အနိုင်ဂိုးသွင်းယူနိုင်ခဲ့လို့ ဝမ်းသာမိကြောင်းဖွင့်ဟလာတဲ့ ဆက်စ်ကို
ယူနိုက်တက် တိုက်စစ်မှူး ဘင်ဂျမင် ဆက်စ်ကိုဟာ တနင်္လာနေ့ညက ဘရန့်ဖို့ဒ်ကို အနိုင်ရရှိခဲ့တဲ့ပွဲစဉ်မှာ ဂိုးပြန်သွင်းနိုင်ခဲ့တဲ့အတွက် ဝမ်းသာပီတိဖြစ်နေပါတယ်။ ပထမပိုင်းမပြီးခင်မှာ ဆက်စ်ကို သွင်းယူပေးခဲ့တဲ့ဂိုးဟာ ယူနိုက်တက်အတွက် အနိုင်ဂိုးဖြစ်ခဲ့ပြီး အဲဒီညမှာ ၂-၁ ဆိုတဲ့ရလဒ်နဲ့ အနိုင်ရရှိခဲ့တာပါ။
ပွဲပြီးဆုံးချိန်မှာတော့ သူက "တကယ်ကို အံ့ဩဖို့ကောင်းတဲ့ ခံစားချက်ပါပဲ။ ခက်ခဲတဲ့အသင်းတစ်သင်းနဲ့ ရင်ဆိုင်ရမယ်ဆိုတာ ကျွန်တော်တို့ သိထားတာကြောင့် ပွဲကတော့ တကယ်ကို ခက်ခဲခဲ့ပါတယ်၊ ဒါပေမဲ့ ပွဲပြီးတဲ့အထိ ရလဒ်ကို ထိန်းထားနိုင်ခဲ့သလို ဒီနိုင်ပွဲနဲ့လည်း ထိုက်တန်ပါတယ်" လို့ ပြောကြားခဲ့ပါတယ်။
"ပွဲကို ဘယ်လိုပုံစံနဲ့ စတင်သလဲဆိုတာက အရမ်းအရေးကြီးပါတယ်။ အဲဒါက ပရိသတ်တွေဆီကနေ အပိုအားအင်တွေကို ရရှိစေပြီး ကျွန်တော်တို့ အဲဒါကို အသုံးချနိုင်ခဲ့တာကြောင့် ဂိုးနှစ်ဂိုး သွင်းယူနိုင်ခဲ့တာပါ" လို့ ဆက်ပြောပါတယ်။ "ပွဲတစ်ပွဲထက်တစ်ပွဲ ကျွန်တော် ပိုပြီး ခံစားချက်ကောင်းလာသလို အသင်းနဲ့လည်း ပိုပြီး အချိတ်အဆက်မိလာပါပြီ" လို့လည်း ဆိုပါတယ်။
ချန်ပီယံလိဂ်ဝင်ခွင့်နေရာနဲ့ နီးစပ်လာတာနဲ့ ပတ်သက်လို့လည်း ဆက်စ်ကိုက "ကျွန်တော်တို့ နောက်ဆုံးမိနစ်အထိ ဆက်ပြီး တွန်းအားပေး ကြိုးစားသွားရပါမယ်။ ဒီနေ့ပြသခဲ့တဲ့ အားအင်တွေကို ဆက်ပြီး သယ်ဆောင်လာဖို့ အရေးကြီးသလို ကျွန်တော်တို့ ဒါကို လုပ်နိုင်မယ်လို့လည်း ယုံကြည်ပါတယ်" လို့ ဖြည့်စွက်ပြောကြားသွားပါတယ်။
