မန်ချက်စတာစီးတီးအသင်းရဲ့ ကွင်းလယ်လူ ရိုဒရီဟာ ဒီရာသီ လက်ကျန်ပွဲစဉ်တွေအားလုံးကို လွဲချော်သွားနိုင်တယ်ဆိုတဲ့ စိုးရိမ်မှုတွေကို နည်းပြဖြစ်သူ ပက်ဂွါဒီယိုလာက ဖြေဖျောက်ပေးလိုက်ပါတယ်။ ဒါပေမဲ့ လာမယ့် ဗုဒ္ဓဟူးနေ့မှာ ကစားမယ့် ဘန်လေနဲ့ အဝေးကွင်းပွဲစဉ်ကိုတော့ ရိုဒရီ လွဲချော်မှာဖြစ်ပါတယ်။

၂၀၂၄ ခုနှစ်ရဲ့ ရွှေဘောလုံးဆုရှင် ရိုဒရီဟာ ပြီးခဲ့တဲ့ တနင်္ဂနွေနေ့က ချန်ပီယံဆုအတွက် အဓိကပြိုင်ဘက်ဖြစ်တဲ့ အာဆင်နယ်ကို ၂-၁ နဲ့ အနိုင်ရခဲ့တဲ့ပွဲမှာ အသင်းအတွက် အရေးပါတဲ့ ခြေစွမ်းပြသခဲ့သူဖြစ်ပြီး ပွဲပြီးခါနီးမှာ ပေါင်ခြံဒဏ်ရာကြောင့် လူစားလဲခဲ့ရတာပါ။ အသက် ၂၉ နှစ်အရွယ်ရှိပြီဖြစ်တဲ့ ရိုဒရီဟာ Turf Moor ကွင်းမှာ ကစားမယ့်ပွဲကို ပါဝင်နိုင်ဖို့ မရှိဘဲ စီးတီးအသင်းကတော့ ဒီနှစ်အတွင်း ပထမဆုံးအကြိမ်အဖြစ် ဇယားထိပ်ဆုံးကို တက်လှမ်းနိုင်ဖို့ ရည်မှန်းနေပါတယ်။

စီးတီးအနေနဲ့ ဘန်လေနဲ့ပွဲပြီးရင်တော့ စနေနေ့မှာ ဆောက်သမ်တန်နဲ့ ကစားမယ့် FA ဖလား ဆီမီးဖိုင်နယ်ပွဲစဉ် ရှိနေတာကြောင့် နောက်ထပ် လိဂ်ပွဲစဉ်ဖြစ်တဲ့ အဲဗာတန်နဲ့ပွဲအထိ ၁၂ ရက်လောက် အချိန်ရမှာပါ။ "မနက်ဖြန်ပွဲအတွက်တော့ သူ အဆင်သင့်ဖြစ်ဦးမှာ မဟုတ်ဘူးလို့ ထင်ပါတယ်" လို့ ဂွါဒီယိုလာက အင်္ဂါနေ့ သတင်းစာရှင်းလင်းပွဲမှာ ပြောပါတယ်။ "နောက်လာမယ့်ပွဲတွေဖြစ်တဲ့ ဆောက်သမ်တန်နဲ့ ဆီမီးဖိုင်နယ် ဒါမှမဟုတ် အဲဗာတန်နဲ့ပွဲတွေကျမှပဲ ပြန်ကြည့်ရမှာပါ" လို့ သူက ဆက်ပြောပါတယ်။

ဒဏ်ရာပြဿနာတွေကြောင့် ၁၈ လလောက် ရုန်းကန်ခဲ့ရတဲ့ ရိုဒရီဟာ အခုအခါမှာတော့ ပုံစံကောင်း ပြန်ရနေပြီး ဘာနာဒိုဆေးဗားနဲ့အတူ ကွင်းလယ်မှာ အားကိုးရတဲ့ အတွဲအဖက်အဖြစ် ကစားနိုင်ခဲ့တာက စီးတီးအသင်း ချန်ပီယံလမ်းကြောင်းပေါ် ပြန်ရောက်လာဖို့ အရေးပါတဲ့ အခန်းကဏ္ဍကနေ ပါဝင်ခဲ့တာပါ။ "သူတို့နှစ်ယောက်လုံးက အတွေ့အကြုံရှိပြီး ထူးခြားတဲ့ ပင်ကိုယ်အရည်အချင်း ရှိကြသူတွေပါ။ အခုဆိုရင် လူငယ်တွေ မဟုတ်တော့ဘဲ အတွေ့အကြုံရင့်နေတဲ့သူတွေ ဖြစ်သလို ဒီလိုပွဲမျိုးတွေကိုလည်း အများကြီး ကစားခဲ့ဖူးပြီးသားပါ။ ဘယ်လိုကစားရမယ်ဆိုတာကိုလည်း ကောင်းကောင်းသိကြပါတယ်။ သူတို့ရဲ့ စွမ်းဆောင်ရည်တွေက တကယ့်ကို ထူးရှယ်ပါပဲ" လို့ ဂွါဒီယိုလာက ချီးကျူးခဲ့ပါတယ်။

စီးတီးအသင်းအနေနဲ့ ဒီပွဲမှာ အနိုင်ရခဲ့ရင် ဘန်လေအသင်းကတော့ တန်းဆင်းသွားရဖို့ သေချာသလောက် ရှိနေပေမဲ့ စီးတီးအတွက်တော့ လက်ကျန် ၅ ပွဲအလိုမှာ အာဆင်နယ်နဲ့ ရမှတ်တူနေဦးမှာ ဖြစ်ပါတယ်။ ဂွါဒီယိုလာရဲ့ အသင်းက အရှိန်အဟုန်ကောင်းနေပေမဲ့ ဥရောပဝင်ခွင့်အတွက် ကြိုးစားနေတဲ့ အဲဗာတန်၊ ဘုန်းမောက်တို့လို အသင်းတွေနဲ့ အဝေးကွင်း သွားရောက်ကစားရမယ့် ပွဲစဉ်တွေ ရှိနေတာကြောင့် သူကတော့ သတိထားနေပါတယ်။ "နှစ်သင်းစလုံးက ရှုံးလို့မရသလို ရမှတ်တွေလည်း အဆုံးရှုံးမခံနိုင်ဘူးဆိုတာ သိကြပါတယ်။ ပြန်ပြီး နာလန်ထူဖို့ဆိုတာ ခက်ခဲတဲ့အပြင် ကျွန်တော်တို့ရဲ့ ပွဲစဉ်ဇယားကလည်း အရမ်းကို ကျပ်တည်းလွန်းပါတယ်။ ပြိုင်ဘက်တွေကလည်း တကယ့်ကို အားကောင်းကြပါတယ်" လို့ ၉ ရာသီအတွင်း ၇ ကြိမ်မြောက် လိဂ်ဖလားကို သိမ်းပိုက်နိုင်ဖို့ ရည်မှန်းထားတဲ့ ဂွါဒီယိုလာက ပြောကြားခဲ့ပါတယ်။