လေဗာကူဆင်ရဲ့ လူငယ်ကြယ်ပွင့်သစ် ကိုဖာနေးကို အာဆင်နယ် ပစ်မှတ်ထားနေ
အာဆင်နယ်အသင်းဟာ ဘေယန်လေဗာကူဆင်အသင်းရဲ့ တိုက်စစ်ပိုင်းမှာ ထင်ပေါ်နေတဲ့ လူငယ်ကြယ်ပွင့် ခရစ်စတီယန် ကိုဖာနေးကို ခေါ်ယူဖို့ စိတ်ဝင်စားနေတယ်လို့ သတင်းတွေအရ သိရပါတယ်။
အသက် ၁၉ နှစ်အရွယ် အဲဒီတိုက်စစ်မှူးလေးဟာ ပြီးခဲ့တဲ့ နွေရာသီကမှ စပိန်ကလပ် အယ်လ်ဘာဆီတေးကနေ လေဗာကူဆင်ဆီ ပြောင်းရွှေ့လာခဲ့တာဖြစ်ပေမဲ့ အသင်းမှာ ခြေစွမ်းပြပြီး လူအများရဲ့ အာရုံစိုက်မှုကို ရရှိနေပြီ ဖြစ်ပါတယ်။
ကိုဖာနေးဟာ လေဗာကူဆင်မှာ အရန်ကစားသမားအဖြစ်သာ အများဆုံး ပါဝင်ကစားနေရပေမဲ့ ပြိုင်ပွဲစုံ ၃၉ ပွဲမှာ သွင်းဂိုး ၇ ဂိုးနဲ့ ဂိုးဖန်တီးမှု ၅ ကြိမ်အထိ ပြုလုပ်ထားနိုင်ပါတယ်။
Sky Sports ရဲ့ ဖော်ပြချက်အရ အာဆင်နယ်အသင်းဟာ လာမယ့် နွေရာသီ အပြောင်းအရွှေ့ကာလမှာ အဲဒီလူငယ်ကစားသမားလေးကို ခေါ်ယူဖို့ အနီးကပ် စောင့်ကြည့်နေတယ်လို့ ဆိုပါတယ်။
လေဗာကူဆင်အသင်းက ကိုဖာနေးကို ယူရို ၆၀ သန်းကနေ ၇၀ သန်းအကြား တန်ကြေးသတ်မှတ်ထားတယ်လို့ သိရပါတယ်။ ဒါဟာ သူ့ကို စတင်ခေါ်ယူစဉ်က ပေးခဲ့ရတဲ့ ယူရို ၅.၂၅ သန်းနဲ့ နှိုင်းယှဉ်ရင် တန်ကြေး အဆမတန် မြင့်တက်လာတာလည်း ဖြစ်ပါတယ်။
