အန်ဖီးလ်မှာ မိုဆာလက်ကို နှုတ်ဆက်ဖို့ ငြင်းဆန်ခဲ့တဲ့ ကာရေဂါ
လီဗာပူးဂန္ထဝင်ဂျေမီကာရေဂါက အန်ဖီးလ်ကွင်းမှာ မိုဟာမက်ဆာလာကို နှုတ်ဆက်ဖို့ ငြင်းဆိုလိုက်ပါတယ်။
မိုဆာလာက အခုရာသီကုန်မှာ လီဗာပူးမှ ထွက်ခွာတော့မယ်လို့ ဒီရက်ပိုင်းအတွင်းမှာပဲ လူမှုကွန်ရက်မှတစ်ဆင့် အသိပေးခဲ့လို့ အားကစားလောကတစ်ခုလုံး အံ့အားသင့်သွားခဲ့ရပါတယ်။
လီဗာပူးအသင်းသမိုင်းတစ်လျှောက် အကောင်းဆုံးကစားသမားတွေအနက် တစ်ဦးအဖြစ် မှတ်တမ်းဝင်မယ့် ဒီအီဂျစ်တိုက်စစ်မှူးက အမေရိကန်လိဂ် (MLS) ဒါမှမဟုတ် ဆော်ဒီပရိုလိဂ်တို့နဲ့လည်း သတင်းတွေ ထွက်ပေါ်နေပါတယ်။
ရာသီပိတ်ပွဲစဉ်အဖြစ် အန်ဖီးလ်မှာ ဘရန့်ဖို့ဒ်နဲ့ ရင်ဆိုင်ရချိန်မှာ မိုဆာလက်က ပရိသတ်တွေကို နှုတ်ဆက်ဖို့ အခွင့်အရေးရဖို့ရှိပြီး ဒါဟာ တကယ့်ကို စိတ်လှုပ်ရှားစရာကောင်းတဲ့ အချိန်တစ်ခု ဖြစ်လာပါလိမ့်မယ်။
ဒါပေမဲ့ ကာရေဂါကတော့ ပိုမိုကြီးမားတဲ့ ရည်မှန်းချက်တွေကြောင့် အဲဒီနှုတ်ဆက်ပွဲမှာ မပါဝင်ချင်ဘူးလို့ ဝန်ခံခဲ့ပါတယ်။
"ကျွန်တော့်မှာ နောက်ဆုံးဖွင့်ဟစရာ တစ်ခုတော့ ရှိပါတယ်။ သူ့ရဲ့ကစားသမားဘဝကို ကျွန်တော် ဂုဏ်ပြုဖို့ရှိပေမဲ့ မေလမှာကစားမယ့် ပရီးမီးယားလိဂ်နောက်ဆုံးပွဲစဉ်အပြီး အန်ဖီးလ်ကွင်းတွင်း ခမ်းနားတဲ့နှုတ်ဆက်ပွဲမှာတော့ ကျွန်တော် ပါဝင်ချင်စိတ် မရှိပါဘူး" လို့ ကာရေဂါက The Telegraph သတင်းစာအတွက် ရေးသားတဲ့ ဆောင်းပါးမှာ ဖော်ပြထားပါတယ်။
"လီဗာပူးလ်ပရိသတ်တိုင်းက ဒီထက်ပိုပြီး ကောင်းမွန်တဲ့၊ ပိုပြီး စိတ်လှုပ်ရှားဖို့ကောင်းတဲ့ အရာတစ်ခုခုကို စိတ်ကူးထားကြပါတယ်။ မိုဆာလက်ရဲ့ စိတ်ဓာတ်နဲ့ အရှုံးမပေးတတ်တဲ့ ပြိုင်ဆိုင်လိုစိတ်ကို သိတာကြောင့် သူဟာ နောက်တစ်ပတ်အကြာ ဘူဒါပက်စ်မှာကစားမယ့် ချန်ပီယံလိဂ်ဗိုလ်လုပွဲဆီ အသင်းကို အောင်ပွဲရအောင် ဦးဆောင်ပြီး အကောင်းဆုံး နှုတ်ဆက်မှုမျိုးကိုပဲ ရည်မှန်းထားပါလိမ့်မယ်။ အဲဒီလို အပြည့်စုံဆုံးနှုတ်ဆက်ပွဲမျိုး ဖြစ်မလာဘူးလို့တော့ လုံးဝလောင်းကြေးမထပ်လိုက်ပါနဲ့" လို့ သူက ဆက်ပြောပါတယ်။
မိုဆာလက်က ကလပ်အသင်းနဲ့အတူ ပရီးမီးယားလိဂ်နဲ့ ချန်ပီယံလိဂ် အပါအဝင် အဓိကဆုဖလားများစွာကို ဆွတ်ခူးပေးထားနိုင်ခဲ့သလို အခုအချိန်အထိ ၄၃၅ ပွဲမှာ ၂၅၅ ဂိုးအထိ သွင်းယူပေးထားပါတယ်။
လက်ရှိမှာ လီဗာပူးအသင်းက အက်ဖ်အေဖလားနဲ့ ချန်ပီယံလိဂ်ဖလားတွေကို ဆက်လက်တိုက်ပွဲဝင်နေရဆဲဖြစ်လို့ မိုဆာလက်ကိုယ်တိုင်လည်း အသင်းအတွက် နောက်ဆုံးဆုဖလားတွေကို ရယူပေးဖို့ ရည်မှန်းထားပါလိမ့်မယ်။
