ဘုန်းမောက်နည်းပြ အီရာအိုလာက မန်ချက်စတာယူနိုက်တက်နဲ့ ရင်ဆိုင်ရမယ့် ပွဲစဉ်မတိုင်ခင် မီဒီယာတွေကို ဖြေကြားခဲ့ပါတယ်။ ဘုန်းမောက်အသင်းဟာ ပြီးခဲ့တဲ့ပွဲစဉ်မှာ တန်းဆင်းဇုန်က ဘန်လေနဲ့ ဂိုးမရှိသရေကျခဲ့တဲ့ ရလဒ်ကနေ ပြန်လည်ရုန်းထွက်နိုင်ဖို့ ကြိုးစားနေတာဖြစ်ပြီး အခုသောကြာနေ့ညမှာတော့ မန်ယူအသင်းကို သူတို့ရဲ့ ဗိုက်တဲလတီးကွင်းမှာ ဧည့်ခံကစားရမှာပါ။ ဒီရလဒ်ကြောင့် အီရာအိုလာရဲ့အသင်းဟာ လိဂ်ပွဲစဉ် ၄ ပွဲဆက်တိုက် သရေကျထားသလို ဖြစ်နေပါတယ်။ သူတို့ဟာ အဲဗာတန်ကိုကျော်ဖြတ်ပြီး အဆင့် ၈ နေရာကို တက်လှမ်းနိုင်ဖို့နဲ့ ဥရောပဝင်ခွင့်အတွက် နောက်ဆုံးအချိန်ထိ တိုက်ပွဲဝင်ဖို့ ကြိုးစားနေတာလည်း ဖြစ်ပါတယ်။

မန်ယူကို အနိုင်မရနိုင်ဘူးဆိုတာ မရှိပါဘူး။ ဒါပေမဲ့ ရာသီကုန်ဖို့ ၈ ပွဲပဲ လိုတော့တာကြောင့် ဘုန်းမောက်အနေနဲ့ မန်ယူလိုအသင်းမျိုးဆီက ၃ မှတ်ရအောင် ယူဖို့ လိုအပ်နေပါပြီ။ အီရာအိုလာကတော့ မန်ယူဟာ အနိုင်မတိုက်နိုင်တဲ့ အသင်းမျိုး မဟုတ်ဘူးလို့ ဆိုပါတယ်။ "မန်ယူကို မတားဆီးနိုင်ဘူးလို့ ကျွန်တော် မပြောလိုပါဘူး၊ ဒါပေမဲ့ သူတို့နဲ့ပွဲမှာ ဂိုးမပေးရအောင် ထိန်းထားဖို့ကတော့ အရမ်းခက်ခဲပါလိမ့်မယ်။ သူတို့က နောက်ပိုင်းမှာ ဂိုးတွေ တောက်လျှောက် သွင်းနေတာလေ။ ကာရစ်လက်ထက်မှာလည်း သူတို့ ဂိုးသွင်းနိုင်စွမ်းက အရင်အတိုင်း ရှိနေတုန်းပါပဲ၊ ဒါပေမဲ့ တိုးတက်လာတာက ခံစစ်ပိုင်းပါ။ အခုဆို သူတို့ ဂိုးမပေးရရုံတင်မကဘူး၊ ပြိုင်ဘက်ကို အခွင့်အရေးတောင် သိပ်မပေးတော့တာက ပိုပြီးတော့ ခက်ခဲတဲ့အချက်ပါပဲ" လို့ ၎င်းက ပြောပါတယ်။

အီရာအိုလာဟာ ကာရစ်ကို သဘောကျသူတစ်ဦးလည်း ဖြစ်ပါတယ်။ မန်ယူ ယာယီနည်းပြ ကာရစ်ဟာ သူ တာဝန်ယူခဲ့တဲ့ ပရီးမီးယားလိဂ် အဖွင့် ၉ ပွဲမှာ ၇ ပွဲအခြေ အနိုင်ရထားပြီး အသင်းရဲ့ အမြဲတမ်းနည်းပြ ဖြစ်လာဖို့လည်း ရေပန်းအစားဆုံး ဖြစ်နေပါတယ်။ ချန်ပီယံလိဂ်ဝင်ခွင့်အတွက် ကြိုးစားနေတဲ့ မန်ယူအသင်းကို အဆင့် ၃ နေရာအထိ ပို့ဆောင်ပေးထားတဲ့ ကွင်းလယ်လူဟောင်း ကာရစ်ကို အီရာအိုလာက အတော်လေး အထင်ကြီး လေးစားနေတာပါ။ "သူက ထိပ်တန်းကစားသမားတစ်ယောက်ပါ။ သူ နည်းပြလုပ်တဲ့အခါမှာလည်း ကစားသမားဘဝတုန်းက သူပိုင်ဆိုင်ခဲ့တဲ့ အရည်အချင်းတွေ၊ ဂိမ်းအပေါ် နားလည်မှုတွေကို တွေ့မြင်နေရပါတယ်။ အကောင်းဆုံး နည်းပြတွေဟာ ကွင်းလယ်လူတွေ ဖြစ်လေ့ရှိတယ်လို့ အမြဲပြောကြလေ့ရှိပြီး သူဟာလည်း အကောင်းဆုံးတွေထဲက တစ်ယောက်ပါပဲ။ သူလုပ်ဆောင်နေတဲ့ ပုံစံကို ကျွန်တော် သဘောကျပါတယ်။ သူ့ကို ပုဂ္ဂိုလ်ရေးအရ မသိပေမဲ့ သူပြောဆိုပုံတွေ၊ အသင်းနဲ့ ကစားသမားတွေအပေါ် ဦးစားပေး လုပ်ဆောင်ပုံတွေကို ကြိုက်ပါတယ်။ သူတို့ တကယ်ကို ကောင်းကောင်း စွမ်းဆောင်နေကြတာပါ" လို့ အီရာအိုလာက ပြောကြားခဲ့ပါတယ်။