ပရီးမီးယားလိဂ် ဂန္ထဝင်အကျော်အမော် အလန်ရှီးယားက ချန်ပီယံလိဂ်မှာ ဘာစီလိုနာနဲ့ ရင်ဆိုင်ရမယ့် နယူးကာဆယ်အသင်းရဲ့ အခြေအနေကို သုံးသပ်ပြောကြားခဲ့ပါတယ်။

ပထမအကျော့မှာ ၁-၁ ဂိုးနဲ့ သရေကျထားတဲ့ ဘာစီလိုနာနဲ့ နယူးကာဆယ်တို့ဟာ လာမယ့် ဗုဒ္ဓဟူးနေ့ညမှာ ချန်ပီယံလိဂ် ၁၆ သင်းအဆင့် ဒုတိယအကျော့အဖြစ် နူးကမ့်ကွင်းမှာ ယှဉ်ပြိုင်ကြမှာ ဖြစ်ပါတယ်။ နယူးကာဆယ်အနေနဲ့ သုံးရာသီဆက်တိုက် ချန်ပီယံလိဂ် ကွာတားဖိုင်နယ်ကို တက်လှမ်းချင်တယ်ဆိုရင်တော့ ဒီရာသီမှာ ခြေစွမ်းအနည်းငယ် ယိမ်းယိုင်နေတဲ့ လာလီဂါ အမှတ်ပေးဇယား ထိပ်ဆုံးက ဘာစီလိုနာကို ကျော်ဖြတ်ရမှာ ဖြစ်ပါတယ်။ စပိန်ထိပ်သီးကလပ် ဘာစီလိုနာဟာ လိဂ်အဆင့် ရှစ်ပွဲမှာ ပီအက်စ်ဂျီ၊ ချဲလ်ဆီးတို့နဲ့ ကစားခဲ့တုန်းက နှစ်ပွဲရှုံးနိမ့်ခဲ့ပြီး အုပ်စုနောက်ဆုံးပွဲမှာ ကိုပင်ဟေဂင်ကို နောက်ကလိုက်ကစားပြီး အနိုင်ယူနိုင်ခဲ့လို့သာ ထိပ်သီးရှစ်သင်းစာရင်းထဲ ပါဝင်ခဲ့တာ ဖြစ်ပါတယ်။

Betfair နဲ့ ပြုလုပ်တဲ့ အင်တာဗျူးမှာတော့ ရှီးယားက နယူးကာဆယ်အနေနဲ့ အံ့အားသင့်စရာ ရလဒ်ကောင်းတစ်ခု ဖော်ဆောင်နိုင်လိမ့်မယ်လို့ ယုံကြည်ကြောင်း ပြောပြခဲ့ပါတယ်။ "နယူးကာဆယ်အနေနဲ့ နူးကမ့်မှာ ခံစစ်ကောင်းကောင်း ကစားဖို့ လိုပါတယ်။ ဘောလုံးပိုင်ဆိုင်မှုပိုင်းမှာတော့ သူတို့ အသာစီးရမှာ မဟုတ်ဘူး၊ ဒါက အဓိကအချက်ပဲ။ ဘာစီလိုနာက သူတို့ရဲ့ ကွင်းအသစ်မှာ ၁၁ ပွဲကစားထားပြီး ၁၁ ပွဲစလုံး နိုင်ထားတာဆိုတော့ တကယ့်ကို ခက်ခဲတဲ့ပွဲ ဖြစ်လာမှာပါ။ ဒုတိယအကျော့မှာ ခံစစ်ကို အရင်ထက်တောင် ပိုပြီး အာရုံစိုက်ကစားရပါလိမ့်မယ်။ အခွင့်အရေးရရင်တော့ တန်ပြန်တိုက်စစ်နဲ့ ထိုးဖောက်ရမယ်။ ဘာစီလိုနာက အခွင့်အရေးတွေ ပေးတတ်ပါတယ်။ သူတို့ရဲ့ အမြင့်တင်ထားတဲ့ ခံစစ်တန်းကို အမိအရ အသုံးချနိုင်ရင် ဂိုးရနိုင်ပါတယ်။ နယူးကာဆယ်ဟာ အရင်ကလည်း သူတို့ခံစစ်နောက်ပိုင်းကို အကြိမ်ကြိမ် ထိုးဖောက်နိုင်ခဲ့ဖူးတာကြောင့် အခွင့်အရေးတွေ ရဦးမှာပါ။ အရေးကြီးတာက ပြိုင်ဘက်ရဲ့ တိုက်စစ်ကို ဘယ်လောက်အထိ တားဆီးနိုင်မလဲဆိုတာပါပဲ၊ ဘာလို့လဲဆိုတော့ ဂိုးမပေးရဘဲ ပြီးဆုံးဖို့က မလွယ်ဘူးလို့ ကျွန်တော် ထင်ပါတယ်။ အခုရလဒ်က သူတို့အတွက် မျှော်လင့်ချက် ရှိနေဆဲပါ။ အရင်ပွဲက ခြေစွမ်းက သူတို့ကို အားတက်စေမှာ ဖြစ်ပေမဲ့ နူးကမ့်မှာ ကစားရမှာကတော့ တကယ့်ကို ကွဲပြားခြားနားတဲ့ အခြေအနေ ဖြစ်ပါလိမ့်မယ်" လို့ ရှီးယားက ဆိုပါတယ်။

ဘာစီလိုနာအသင်းဟာ ဥရောပပြိုင်ပွဲတွေမှာ အင်္ဂလန်ကလပ်တွေနဲ့ အိမ်ကွင်း ၃၇ ပွဲ ရင်ဆိုင်ခဲ့ရာမှာ ၂ ပွဲသာ ရှုံးနိမ့်ဖူးတာကြောင့် နယူးကာဆယ်သာ အနိုင်ရခဲ့ရင်တော့ ဒါဟာ ကလပ်သမိုင်းတစ်လျှောက် အမှတ်တရ အဖြစ်ဆုံး အခိုက်အတန့်တွေထဲက တစ်ခု ဖြစ်လာမှာ ဖြစ်ပါတယ်။