ချဲလ်ဆီး တောင်ပံကစားသမား နက်တိုကို ဘာစီလိုနာ ကင်းထောက်တွေ စောင့်ကြည့်နေ
ဘာစီလိုနာအသင်းဟာ ချဲလ်ဆီးအသင်းရဲ့ တောင်ပံကစားသမား ပတ်ဒရို နက်တိုကို ခေါ်ယူဖို့ စိတ်ဝင်စားနေပါတယ်။
ဘာစီလိုနာဟာ အခုရာသီမှာ ဒီပေါ်တူဂီလက်ရွေးစင်ကစားသမားကို စောင့်ကြည့်နေခဲ့တာဖြစ်ပြီး သူတို့ရဲ့ ကင်းထောက်တွေကလည်း နက်တိုနဲ့ ပတ်သက်ပြီး အလွန်ကောင်းမွန်တဲ့ အစီရင်ခံစာတွေ တင်ပြထားကြပါတယ်။
ဘာစီလိုနာဟာ နက်တိုကို မန်ချက်စတာယူနိုက်တက်ကနေ အငှားနဲ့ လာရောက်ကစားနေတဲ့ တိုက်စစ်မှူး မားကပ်စ် ရက်ရှ်ဖို့ဒ်ရဲ့ နေရာမှာ အစားထိုးနိုင်မယ့်သူတစ်ဦးအဖြစ် ရှုမြင်နေတယ်လို့ Mirror သတင်းဌာနက ဖော်ပြခဲ့ပါတယ်။
ရက်ရှ်ဖို့ဒ်ရဲ့ စာချုပ်မှာ ယူရို သန်း ၃၀ နဲ့ အပြီးသတ်ဝယ်ယူနိုင်မယ့် အချက် ပါဝင်နေပေမဲ့ ဘာစီလိုနာအသင်းတွင်းက တချို့သူတွေကတော့ နက်တိုဟာ ရက်ရှ်ဖို့ဒ်ထက် ပိုပြီး အရည်အချင်းရှိတဲ့သူအဖြစ် သတ်မှတ်ထားကြတာပါ။
နက်တိုဟာ ချဲလ်ဆီးအသင်းနဲ့ ၂၀၃၁ ခုနှစ်အထိ စာချုပ်သက်တမ်းရှိနေတာကြောင့် ချဲလ်ဆီးဘက်ကတော့ သူ့ကို ရောင်းထုတ်ဖို့ ဝန်လေးနေမယ့် အခြေအနေမှာ ရှိနေပါတယ်။
