ဖူလ်ဟမ်နှင့်ပွဲရလဒ်မှာ မတရားဟု ဆန်းဒါးလန်းနည်းပြ လီဘရစ် ဆို
ပြီးခဲ့တဲ့ တနင်္ဂနွေနေ့က အိမ်ကွင်းမှာ ဖူဟမ်အသင်းကို ၃-၁ ဂိုးနဲ့ ရှုံးနိမ့်ခဲ့တဲ့ပွဲစဉ်ရဲ့ ရလဒ်ဟာ ပွဲကစားပုံကို အမှန်အတိုင်း ထင်ဟပ်ခြင်းမရှိဘဲ တရားမျှတမှုမရှိဘူးလို့ ဆန်းဒါးလန်းနည်းပြ ရီဂျစ်လီဘရစ်က အခိုင်အမာ ပြောကြားလိုက်ပါတယ်။
ဒီပွဲမှာ ဧည့်သည်ဖူဟမ်အသင်းအတွက် ရာအူးလ်ဂျီမင်းနက်ဇ်က နှစ်ဂိုးသွင်းယူခဲ့ပြီး အဲလက်စ်အီဝိုဘီက တစ်ဂိုး ထပ်မံသွင်းယူခဲ့တာပါ။ ဆန်းဒါးလန်းအတွက် တစ်လုံးတည်းသော ချေပဂိုးကိုတော့ အန်ဇိုလီဖီးက သွင်းယူပေးခဲ့ပါတယ်။
လီဘရစ်က "ဒီပွဲက အရေးကြီးတဲ့ အခိုက်အတန့်တွေအပေါ်မှာပဲ မူတည်သွားခဲ့တာပါ။ ကျွန်တော်တို့မှာ ဂိုးသွင်းဖို့ အခွင့်အရေးရခဲ့ပေမဲ့ အဲဒီနောက်မှာတင် သူတို့က တည်ကန်ဘောတွေကနေတစ်ဆင့် နှစ်ဂိုး ဆက်တိုက်သွင်းသွားခဲ့ပါတယ်" လို့ ဆိုပါတယ်။
"ဒါဟာ အကြိတ်အနယ်ရှိခဲ့တဲ့ ပွဲတစ်ပွဲဖြစ်ပြီး ကျွန်တော်တို့ မျှော်လင့်ထားသလိုမျိုး ပွဲကို မစိုးမိုးနိုင်ခဲ့ပါဘူး။ ပထမပိုင်းမှာ ကစားပုံက နည်းနည်းလေး နှေးကွေးပြီး အမှားအယွင်းတွေ ရှိခဲ့သလို ဒဏ်ရာပြဿနာတွေကြောင့်လည်း အနှောင့်အယှက် ဖြစ်ခဲ့ရပါတယ်။ ကျွန်တော်တို့ အခြေအနေကို ထိန်းချုပ်ဖို့ ကြိုးစားခဲ့ပြီး တတိယဂိုး မပေးရခင်အထိတော့ ပွဲထဲမှာ အာရုံစိုက်မှု ရှိနေခဲ့ပါသေးတယ်" လို့ ၎င်းက ဆက်ပြောပါတယ်။
ဒဏ်ရာရသွားတဲ့ ကစားသမားတွေနဲ့ ပတ်သက်ပြီးတော့လည်း "ဒဏ်ရာအခြေအနေကို အသေးစိတ် သုံးသပ်ချက်ပေးဖို့တော့ နည်းနည်း စောပါသေးတယ်။ နော်ဒီမူကီယီလီက ခြေသလုံးကြွက်သားဒဏ်ရာဖြစ်ပြီး ဂျိုစလင်တာဘီကတော့ ခြေကျင်းဝတ်ဒဏ်ရာပါ။ ကျွန်တော်တို့က ခက်ခဲတဲ့လိဂ်မှာ ကစားနေရတာဖြစ်လို့ အဆင့်သစ်တစ်ခုကို တက်လှမ်းနိုင်ဖို့ဆိုတာ အရည်အသွေးအပေါ်မှာပဲ မူတည်ပါတယ်။ လောလောဆယ်မှာတော့ ကျွန်တော်တို့ရဲ့ အဓိကအရည်အသွေးက စည်းလုံးညီညွတ်မှုနဲ့ အသင်းအတွင်း ချိတ်ဆက်မှုတွေကို ကောင်းမွန်အောင် ထိန်းသိမ်းနိုင်ဖို့ပဲ ဖြစ်ပါတယ်" လို့ ပြောကြားခဲ့ပါတယ်။
