လီဗာပူးနဲ့ပွဲမှာ ဘာနာဒို ဆေးလ်ဗား ပါဝင်နိုင်ဖို့ မသေချာကြောင်း ဂွါဒီယိုလာ အတည်ပြု
မန်ချက်စတာစီးတီးအသင်းရဲ့ နည်းပြ ပက်ဂွါဒီယိုလာက လာမယ့်တနင်္ဂနွေနေ့မှာ ကစားမယ့် လီဗာပူးနဲ့ အရေးကြီးပွဲစဉ်အတွက် အဓိကကွင်းလယ်လူ ဘာနာဒို ဆေးလ်ဗား ပါဝင်နိုင်ဖို့ အလွန်ပင် မသေချာသေးကြောင်း ထုတ်ဖော်ပြောကြားလိုက်ပါတယ်။
အဆိုပါ ကွင်းလယ်ကစားသမားဟာ ဒဏ်ရာကြောင့် ဘယ်လောက်အထိ အချိန်ကြာမြင့်စွာ အနားယူရမလဲဆိုတာကိုလည်း အတိအကျ မသိရသေးဘူးလို့ ဆိုပါတယ်။
ဆေးလ်ဗားဟာ ကြွက်သားဒဏ်ရာကြောင့် နယူးကာဆယ်ကို ၃ ဂိုး ၁ ဂိုးနဲ့ အနိုင်ရရှိခဲ့တဲ့ ကာရာဘောင်ဖလား ဆီမီးဖိုင်နယ် ဒုတိယအကျော့ပွဲစဉ်ကို လွဲချော်ခဲ့ရသူ ဖြစ်ပါတယ်။ အဆိုပါပွဲစဉ်မှာ အနိုင်ရခဲ့တာကြောင့် မန်စီးတီးအသင်းဟာ ဗိုလ်လုပွဲမှာ အာဆင်နယ်အသင်းနဲ့ ရင်ဆိုင်ရတော့မှာပါ။
ဆေးလ်ဗားရဲ့ ဒဏ်ရာအခြေအနေ ပြင်းထန်မှုနဲ့ ပတ်သက်ပြီး မေးမြန်းရာမှာတော့ ဂွါဒီယိုလာက "ကျွန်တော် မသိသေးပါဘူး။ ဘာနာဒိုက ကျွန်တော်တို့အတွက် အထူးခြားဆုံး ကစားသမားတစ်ဦးပါ။ ဆက်လက်စောင့်ကြည့်ရဦးမှာပါ" လို့ ပြောကြားခဲ့ပါတယ်။
ဆက်လက်ပြီး ဂွါဒီယိုလာက "မနေ့ကတော့ သူနေလို့ကောင်းတယ်၊ ကြိုးစားကြည့်ချင်တယ်လို့ ကျွန်တော့်ကို ပြောပါတယ်။ ဒါပေမဲ့ အခြေအနေကို သေချာမသိသေးဘူး။ သူ့ဒဏ်ရာက တံကောက်ကြောဒဏ်ရာလောက်တော့ မပြင်းထန်ပေမဲ့ အဲ့ဒီနားက ကြွက်သားမှာ ဖြစ်နေတာပါ" လို့ ရှင်းပြခဲ့ပါတယ်။
"နောက်ရက်တွေမှာ အခြေအနေကို ဆက်ကြည့်ရမှာဖြစ်သလို တနင်္ဂနွေနေ့ပွဲအတွက်လည်း သူပါဝင်နိုင်ဖို့ အတော်လေးကို မသေချာတဲ့ အနေအထားမှာ ရှိနေပါတယ်။ ဒါပေမဲ့ သူကတော့ ပါဝင်နိုင်ဖို့ အစွမ်းကုန် ကြိုးစားသွားမှာပါ" လို့လည်း ပက်ဂွါဒီယိုလာက ဖွင့်ဟခဲ့ပါတယ်။
