လက်စတာစီးတီးအသင်းဟာ နယူးကာဆယ်ယူနိုက်တက်ခံစစ်မှူးလက်စ်ဆဲလက်စ်ကို ခေါ်ယူလိုက်ပြီဖြစ်ကြောင်း တရားဝင်အတည်ပြုထုတ်ပြန်လိုက်ပါတယ်။

အသက် ၃၂ နှစ်အရွယ်လက်စ်ဆဲလက်စ်ဟာ နယူးကာဆယ်အသင်းအတွက် ပွဲပေါင်း ၂၅၀ ကျော် ကစားပေးခဲ့ပြီး အသင်းခေါင်းဆောင်တစ်ဦးအဖြစ် နှစ်ပေါင်းများစွာ တာဝန်ယူခဲ့ပါတယ်။

အပြောင်းအရွှေ့စျေးကွက်ပိတ်သိမ်းပြီးနောက် အင်္ဂါနေ့မနက်ပိုင်းမှာပဲ လက်စတာအသင်းက သူတို့ရဲ့ ခံစစ်မှူးသစ်ကို ပရိသတ်တွေရှေ့မှာ တရားဝင် မိတ်ဆက်ပေးခဲ့ပါတယ်။လက်ဆဲလက်စ်က လက်စတာအသင်းဝက်ဘ်ဆိုဒ်မှတဆင့် သူ့ရဲ့ခံစားချက်ကိုပြောကြားရာမှာ အခုလိုပြောင်းရွှေ့နိုင်ခဲ့လို့ အလွန်ဝမ်းသာမိကြောင်းနဲ့ ချန်ပီယံရှစ်ပြိုင်ပွဲမှာ အသင်းအတွက် အစွမ်းကုန် ပေးဆပ်သွားမှာဖြစ်ကြောင်း ဖွင့်ဟခဲ့ပါတယ်။

“ဒီကို ရောက်လာရတာ တကယ်ကို စိတ်လှုပ်ရှားမိပါတယ်။ ဒီက အဆောက်အအုံတွေ၊ လေ့ကျင့်ရေးကွင်းတွေနဲ့ ပရိသတ်တွေရဲ့ အားပေးမှုတွေက တကယ်ကို ခမ်းနားပါတယ်။ ကျွန်တော် အသင်းကို အတတ်နိုင်ဆုံး ကူညီပေးသွားမှာဖြစ်သလို အသင်းဖော်သစ်တွေနဲ့ တွေ့ဆုံဖို့လည်း မစောင့်နိုင်တော့ပါဘူး” လို့ ၎င်းက ပြောကြားခဲ့ပါတယ်။

ဒါ့အပြင် ၎င်းက “ကျွန်တော့်ရဲ့ ကျွမ်းကျင်မှုနဲ့ စံနှုန်းတွေကို အသင်းအတွက် အပြည့်အဝအသုံးချသွားမှာပါ။ ဒါတွေက ကျွန်တော့်အတွက်တော့ ညှိနှိုင်းလို့မရတဲ့အရာတွေပါပဲ။ နေ့တိုင်း ကိုယ့်ကိုယ်ကိုယ်ရော အသင်းဖော်တွေကိုပါ စံနှုန်းမြင့်မြင့်ထားရှိနိုင်အောင် တွန်းအားပေးသွားမှာပါ” လို့ ဆိုပါတယ်။

လေ့ကျင့်ရေးကွင်းထဲမှာ ဒီလိုစံနှုန်းမျိုးကို ထိန်းထားနိုင်မှသာ ရလဒ်ကောင်းတွေ ထွက်ပေါ်လာလိမ့်မယ်လို့လည်း လာဆဲလ်စ်က ယုံကြည်နေပါတယ်။

၎င်းက ဆက်လက်ပြီး “ကျွန်တော် အရာအားလုံးကို ပေးဆပ်သွားမှာပါ။ အသင်းအတွက်ဆိုရင် အုတ်တံတိုင်းကိုတောင် ထိုးဖောက်ဝင်သွားမယ့် စိတ်ဓာတ်မျိုးနဲ့ အစွမ်းကုန်ကစားသွားပါမယ်” လို့ ကြုံးဝါးခဲ့ပါတယ်။

လက်ဆဲလက်စ်ဟာ ၂၀၂၃ ခုနှစ် အောက်တိုဘာလမှာ ပီအက်စ်ဂျီကို ၄-၁ ဂိုးဖြင့် အနိုင်ယူခဲ့တဲ့ သမိုင်းဝင် ချန်ပီယံလိဂ်ပွဲစဉ်အတွက် နယူးကာဆယ်ရဲ့အသင်းခေါင်းဆောင်အဖြစ် တာဝန်ယူခဲ့သလို အသင်းကို ချန်ပီယံရှစ်မှ ပရီးမီးယားလိဂ်ဆီ တက်လှမ်းနိုင်အောင် ဦးဆောင်ပေးခဲ့သူလည်း ဖြစ်ပါတယ်။

အတွေ့အကြုံရင့် ခံစစ်မှူးဖြစ်တာကြောင့် လက်စတာရဲ့ ခံစစ်ပိုင်းကို အများကြီး အားဖြည့်ပေးနိုင်မှာဖြစ်ပြီး လာမယ့်သီတင်းပတ် ဘာမင်ဂမ်စီးတီးနဲ့ ပွဲစဉ်မှာတင် စတင်ပါဝင်လာနိုင်ဖွယ် ရှိပါတယ်။

လက်ရှိမှာတော့ လက်စတာစီးတီးအသင်းဟာ အမှတ်ပေးဇယားရဲ့ အဆင့် ၁၆ မှာ ရောက်ရှိနေပြီး လာဆဲလ်စ်ရဲ့ အတွေ့အကြုံတွေနဲ့အတူ ဇယားအထက်ပိုင်းကို ပြန်လည်တက်လှမ်းနိုင်ဖို့ မျှော်လင့်နေတာ ဖြစ်ပါတယ်။