နော်တင်ဟမ်ဖောရက်စ်ကို အနိုင်ယူပြီးနောက် ချာကီကို ချီးကျူးဂုဏ်ပြုခဲ့တဲ့ ပက်ဂွါဒီယိုလာ
နော်တင်ဟမ်ဖောရက်စ်ကို ၂-၁ ဂိုးဖြင့် မန်စီးတီးတို့ အနိုင်ယူခဲ့တဲ့ ပရီးမီးယားလိဂ်ပွဲစဉ်မှာ အဓိကအခန်းကဏ္ဍတစ်ခုအဖြစ် ပါဝင်ခဲ့ပြီးနောက် ချာကီကို ဖက်နမ်းချင်ခဲ့တယ်လို့ ပက်ဂွါဒီယိုလာက ပြောပါတယ်။
အခုပွဲစဉ်အတွက် အဖွင့်ဂိုးကို ဖန်တီးပေးသလို အနိုင်ဂိုးပါသွင်းယူပေးခဲ့တဲ့ အသက်-၂၂ နှစ်အရွယ်ကွင်းလယ်ကစားသမားရဲ့ မယုံကြည်နိုင်စရာ အရည်အသွေးပိုင်းကို မန်စီးတီးနည်းပြကိုယ်တိုင် သဘောကျနေပါတယ်။
ပွဲစဉ်အပြီး ပက်ဂွါဒီယိုလာက “ ချာကီရဲ့မယုံကြည်နိုင်စရာအရည်အသွေးကို ဖော်ပြခွင့် ပေးသွားချင်ပါတယ်။
ကျွန်တော့်မှာ သူ့ကို အော်ဟစ်ခဲ့ရတဲ့အချိန်တွေ ရှိသလို ဖက်နမ်းချင်ခဲ့တဲ့အချိန်တွေလည်း ရှိပါတယ်”လို့ ပြောပါတယ်။
လတ်တလောမှာ မန်စီးတီးက ပရီးမီးယားလိဂ်နောက်ဆုံးခြောက်ပွဲဆက်အနိုင်ရရှိထားပြီး စီတီးဂရောင်းကွင်းရဲ့ ဧည့်သည်အသင်းပရိသတ်ရှေ့မှောက်မှာ ပက်ဂွါဒီယိုလာကိုယ်တိုင် ဝမ်းမြောက်ဝမ်းသာ အောင်ပွဲခံခဲ့ပါတယ်။
သူက ရှောင်ဒိုက်စီမံခန့်ခွဲတဲ့ ခပ်ကြမ်းကြမ်းနော်တင်ဟမ်ဖောရက်စ်နဲ့ရင်ဆိုင်ရချိန် သူ့အသင်းမှာ အကောင်းဆုံးပုံစံနဲ့ ဝေးကွာသွားတယ်လို့ ဝန်ခံခဲ့ပါတယ်။
အထူးသဖြင့် ပြီးခဲ့တဲ့ရာသီ၊ ဒီကွင်းမှာပဲ ၁-၀ ဂိုးဖြင့် ရှုံးနိမ့်ခဲ့မှုကြောင့် အနိုင်ရရှိဖို့အတွက် တိုက်ပွဲဝင်ရတဲ့ သဘောသဘာဝဟာ အဓိပ္ပါယ်ပြည့်ဝလွန်းတယ်လို့ ပက်ဂွါဒီယိုလာက ပြောပါတယ်။
စပိန်သားနည်းပြက “ မှတ်မိဖို့ခက်ခဲတယ်ဆိုတာ ကျွန်တော်သိပါတယ်။ ဒါပေမဲ့ ကျွန်တော်တို့ ပရီးမီးယားလိဂ်ချန်ပီယံဆုခြောက်ကြိမ်တိုင်ရရှိခဲ့ချိန်မှာ အခုလိုပွဲစဉ်တွေ အများကြီးနဲ့ ကြုံတွေ့ခဲ့ဖူးပါတယ်။ ဒါကြောင့် အလွန်အရေးကြီးတဲ့သုံးမှတ် ဖြစ်ပါတယ်”လို့ ပြောပါတယ်။
ဆက်လက်ပြီး ပက်ဂွါဒီယိုလာက ရှောင်ဒိုက်ကို သင့်တော်ပြီး ထိပ်တန်းအရည်အသွေးမျိုးရှိတဲ့ အသင်းတစ်ခု ဖန်တီးထားနိုင်ခြင်းအတွက် ချီးကျူးဂုဏ်ပြုခဲ့ပါတယ်။
ဒါ့အပြင် အကောင်းဆုံးပုံစံမရရှိချိန် မန်စီးတီးအသင်းရဲ့ဇွဲလုံ့လနဲ့ ခံနိုင်ရည်ရှိမှုအတွက် အရေးပါပုံကို သူက အလေးပေးပြောကြားခဲ့ပါတယ်။
ပက်ဂွါဒီယိုလာက “ ပြီးခဲ့တဲ့ရာသီတုန်းကဆိုရင် အခုလိုပွဲစဉ်မျိုး ၁၀ ပွဲကစားရင် ၁၀ ပွဲလုံး ရှုံးနိမ့်ပါတယ်”လို့ ပြောဆိုရင်း နိဂုံးချုပ်ခဲ့ပါတယ်။
