ကမ္ဘာ့ဖလားခြေစစ်ပွဲတိုက်ရိုက်အောင်မြင်နိုင်ရေးအတွက် အနီးကပ်ဆုံးပြိုင်ဘက်ဖြစ်တဲ့ ဂျော်ဒန်နဲ့ တစ်ဖက်တစ်ဂိုးစီသရေကျပြီးနောက် ဆွန်ဟောင်မင်က ၂၀၂၆ ကမ္ဘာ့ဖလားခြေစစ်ပွဲခရီးစဉ်အတွင်း တောင်ကိုရီးယားအသင်းကို ရုန်းကန်ရစေတဲ့ ဘောလုံးကွင်းအခြေအနေတွေအပေါ် ပြင်းပြင်းထန်ထန် ဝေဖန်ပြစ်တင်ခဲ့ပါတယ်။

လွန်ခဲ့တဲ့သီတင်းပတ်၊ အိုမန်နဲ့ အိမ်ကွင်းသရေပွဲစဉ်အပြီး တောင်ကိုရီးယားသားတွေက ယမန်နေ့(အင်္ဂါနေ့)မှာ အိမ်ကွင်းပွဲစဉ်နှစ်ပွဲဆက်ကို ယှဉ်ပြိုင်ကစားခဲ့ကာ အာရှဇုန်ခြေစစ်ပွဲအုပ်စု(B) ရဲ့ထိပ်ဆုံးနေရာမှာ ကျဉ်းမြောင်းတဲ့အသာရမှုဖြင့် ဦးဆောင်ထားခဲ့ပါတယ်။ သူတို့တွေက အုပ်စုတတိယနေရာမှာရှိနေတဲ့ အီရတ်ကို အဝေးကွင်းမှာ သွားရောက်ရင်ဆိုင်ရပါဦးမယ်။ တောင်ကိုရီးယားရဲ့ မတ်လကမ္ဘာ့ဖလားခြေစစ်ပွဲစဉ်နှစ်ခုကို မြို့တော်ရှိအားကစားကွင်းမျက်နှာပြင်ညံ့ဖျင်းမှုတွေကြောင့် ဆိုးလ်မြို့မှာ မကျင်းပနိုင်ခဲ့သလို ကပ္ပတိန်ဆွန်ဟောင်မင်ကလည်း သတ်မှတ်စံချိန်စံညွှန်းတွေအောက်ရှိနေဆဲ ဘောလုံးကွင်းတွေလို့ပြောဆိုရင်း သူ့နိုင်ငံဘောလုံးအာဏာပိုင်တွေဆီဦးတည်ကာ ဝေဖန်ထိုးနှက်ခဲ့ပါတယ်။

ဆူဝမ်မြို့ပွဲစဉ်အပြီး တော့တင်ဟမ်တိုက်စစ်မှူးက “ အိမ်ကွင်းမှာကစားရချိန် ဖြစ်နိုင်သမျှ အကောင်းဆုံးအခြေအနေအောက်မှာ ကစားရမယ်လို့ ယူဆထားခဲ့ပေမယ့် ကိစ္စတွေအားလုံးမှာ တိုးတက်မှု လုံးဝမရှိပါဘူး။ ကျွန်တော်တို့တွေ ဒီထက်ပိုကောင်းအောင်ကစားနိုင်တယ်ဆိုတာ သိပါတယ်။ ဒါပေမယ့် အခုလိုမျိုးအခြေအနေမှာတော့ အိမ်ကွင်းအားသာချက်ကို ဘယ်နေရာမှာရရှိနိုင်မလဲဆိုတာ ကျွန်တော်လည်း အံ့သြတကြီးရှာဖွေမိပါတယ်”လို့ ပြောပါတယ်။

တောင်ကိုရီးယားအသင်းက ပြီးခဲ့တဲ့နှစ်၊အောက်တိုဘာလအတွင်း အီရတ်ကိုဧည့်ခံကစားရတဲ့ ကမ္ဘာ့ဖလားခြေစစ်ပွဲအိမ်ကွင်းပွဲစဉ်ကိုလည်း ဘောလုံးကွင်းအခြေအနေတွေကြောင့် ဆိုးလ်မြို့တော်ရဲ့အဝေးမှာ သွားရောက်ယှဉ်ပြိုင်ကစားခဲ့ပါတယ်။

ဆွန်ဟောင်မင်က “ အခုလိုပြောနေတာတွေက ဆင်ခြေပေးနေသလိုမျိုး ဖြစ်လိမ့်မယ်ဆိုတာ ကျွန်တော်သိပါတယ်။ ဒါပေမယ့် ဘောလုံးအားကစားမှာ အသေးစိတ်အချက်အလက်တွေက အတော်လေးအရေးကြီးပါတယ်။ ဒီလိုအသေးစိတ်အချက်အလက်လေးတွေကပဲ သုံးမှတ်အပြည့်ရရှိခြင်း (သို့မဟုတ်) တစ်မှတ်သာရရှိခြင်းဆိုတဲ့ ခြားနားချက်ကို ဖြစ်စေနိုင်ပါတယ်။ ပရိသတ်တွေကိုယ်တိုင်လည်း အခုအခြေအနေကို ပိုမိုအာရုံစိုက်ပေးမယ်လို့ မျှော်လင့်မိပါတယ်”လို့ ပြောပါတယ်။

ဂျော်ဒန်နဲ့သရေပွဲစဉ်အပြီး တောင်ကိုရီးယားက ရမှတ် ၁၆ မှတ်ဖြင့် အုပ်စုဗိုလ်အဖြစ် ရပ်တည်နေပြီး ဂျော်ဒန်ထက် သုံးမှတ်အသာ၊ အီရတ်ထက် လေးမှတ်အသာ ရရှိထားပါတယ်။ အီရတ်ကတော့ အခုမတ်လနိုင်ငံတကာသီတင်းပတ်အတွင်း ပါလက်စတိုင်းကို အဝေးကွင်းမှာ ၂-၁ ဂိုးဖြင့် အံ့အားသင့်ဖွယ် ရှုံးနိမ့်ခဲ့ပါတယ်။

အုပ်စုပွဲစဉ်တွေအပြီး အမှတ်ပေးဇယားထိပ်ဆုံးမှာ ရပ်တည်နိုင်မယ့်အသင်းနှစ်ခုက ၂၀၂၆ ကမ္ဘာ့ဖလားပြိုင်ပွဲဆီ တိုက်ရိုက်ဝင်ခွင့်ရရှိပါလိမ့်မယ်။ တောင်ကိုရီးယားအသင်းကတော့ လာမယ့်ပွဲစဉ်မှာ အီရတ်နဲ့ယှဉ်ပြိုင်ကစားပြီးနောက် အုပ်စုနောက်ဆုံးပွဲစဉ်အဖြစ် ကူဝိတ်ကို အိမ်ကွင်းမှာ ဧည့်ခံကစားရပါမယ်။

ဆွန်ဟောင်မင်က “ အခုလို စိတ်ပျက်စရာတွေရှိနေပေမယ့် ကျွန်တော်တို့တွေက အုပ်စုထိပ်ဆုံးနေရာမှာ ရှိနေဆဲပဲဖြစ်ပါတယ်။ အုပ်စုပွဲစဉ်တွေပြီးဆုံးချိန်အထိလည်း ဒီနေရာမှာ ဆက်ရှိနေချင်ပါတယ်”လို့ ပြောပါတယ်။