တိုက်စစ်မှူးက ကမ်းလှမ်းမှုများစွာကို ပယ်ချခဲ့တဲ့အတွက် တစ်ရာသီလုံး အရန်ခုံမှာသာ ကုန်ဆုံးရနိုင်ကာ လိုက်ပ်ဇစ်အသင်းက တိုက်စစ်မှူး တိမို ဝါနာကို ထုတ်ပယ်ဖို့ မျှော်လင့်ချက် ဆုံးရှုံးခဲ့ပါတယ်။ Sport သတင်းဌာနရဲ့ ဖော်ပြချက်အရတော့ လိုက်ပ်ဇစ်အသင်းဟာ ဝါနာကို ဘွန်ဒက်စ်လီဂါ ဘောလုံးရာသီ မစတင်ခင် ရောင်းထုတ်ဖို့ အစီအစဉ်ကနေ လက်လျှော့လုနီးပါး ဖြစ်နေပါပြီ။ ဂျာမန်တိုက်စစ်မှူးဟာ ကလပ်မှာ အနာဂတ်မရှိတော့ဘူးလို့ သိထားပေမဲ့ အမေရိကန်နဲ့ စီးရီးအေကနေ ရရှိထားတဲ့ ကမ်းလှမ်းမှုတွေကို ပယ်ချခဲ့တယ်လို့ သိရပါတယ်။

၂၀၂၆ ခုနှစ်အထိ စာချုပ်ရှိထားတဲ့ ဝါနာဟာ ရာသီအကြိုခြေစမ်းပွဲ ၄ ပွဲနဲ့ ဆန်းဟောင်းဆန်နဲ့ ကစားခဲ့တဲ့ ဂျာမန်ဖလားပွဲစဉ်တွေမှာ နည်းပြ အိုလီ ဝါနာက အသုံးပြုခဲ့ခြင်း မရှိပါဘူး။ ဘိုင်ယန်မြူးနစ်နဲ့ ဘွန်ဒက်စ်လီဂါ အဖွင့်ပွဲစဉ်မှာလည်း လူစာရင်းမှာ ပါဝင်လာမှာ မဟုတ်ဘူးလို့လည်း မျှော်လင့်ရပါတယ်။ လိုက်ပ်ဇစ်ရဲ့ မိတ်ဖက်အသင်းဖြစ်တဲ့ နယူးယော့ခ် ရက်ဒ်ဘူးလ်အသင်းဆီကို ပြောင်းရွှေ့ဖို့ ကိစ္စကလည်း ဝါနာက တစ်နှစ်ကို ယူရို ၁၀ သန်းကျော်တန်တဲ့ လစာကို ပယ်ချခဲ့တဲ့အတွက် ပျက်သွားခဲ့ပါတယ်။

လိုက်ပ်ဇစ်မှာ ကစားချိန်ရဖို့ အခွင့်အလမ်းမရှိပေမဲ့လည်း ပြောင်းရွှေ့ဖို့ မလုပ်ချင်တဲ့ ဝါနာရဲ့ ဆန္ဒကတော့ အသင်းအတွက် ကြီးမားတဲ့ ပြဿနာတစ်ခုကို ဖြစ်စေခဲ့ပါတယ်။ အသက် ၂၉ နှစ်အရွယ် ဝါနာဟာ အသင်းရဲ့ ဝင်ငွေအများဆုံး ကစားသမားတစ်ဦးဖြစ်ပြီး သူ့ရဲ့ မြင့်မားတဲ့လစာကလည်း အပြောင်းအရွှေ့အတွက် အဓိက အတားအဆီးတစ်ခု ဖြစ်နေပါတယ်။ အပြောင်းအရွှေ့ကာလက စက်တင်ဘာလ ၁ ရက်နေ့မှာ ပိတ်မှာဖြစ်ပေမဲ့ ဝါနာဟာ စီးရီးအေက ကမ်းလှမ်းမှုတွေကို ပယ်ချထားပြီးသားဖြစ်တဲ့အပြင် ဆော်ဒီအာရေးဗျဘက်ကိုလည်း ပြောင်းရွှေ့ဖို့ စိတ်မဝင်စားပါဘူး။

ဝါနာဟာ ပြီးခဲ့တဲ့ရာသီက လိုက်ပ်ဇစ်ကနေ တော့တင်ဟမ်ဆီ အငှားသွားရောက်ခဲ့ပါတယ်။ အဲ့ဒီမှာတော့ သူဟာ ပြိုင်ပွဲအားလုံးမှာ ၂၇ ပွဲကစားပြီး ၁ ဂိုးသာ သွင်းယူနိုင်ခဲ့ပါတယ်။ ပရီးမီးယားလိဂ်မှာလည်း ၄ ပွဲသာ ပွဲထွက်ကစားခွင့် ရခဲ့ပါတယ်။

အမေရိကန်လိဂ်ရဲ့ အပြောင်းအရွှေ့ဈေးကွက်က ပိတ်သွားပြီဖြစ်တဲ့အပြင် တခြားရွေးချယ်စရာတွေကိုလည်း ဝါနာက ပယ်ချထားတာကြောင့် သူ့ရဲ့ အနာဂတ်က အကျပ်အတည်းနဲ့ ရင်ဆိုင်နေရပါတယ်။ သူ့အနေနဲ့ အရင်က ရရှိထားတဲ့ ကမ်းလှမ်းမှုအားလုံးကို ပြတ်ပြတ်သားသား ပယ်ချထားတဲ့အတွက် လိုက်ပ်ဇစ်မှာပဲ ဆက်ရှိနေနိုင်ပြီး ဘွန်ဒက်စ်လီဂါရဲ့ ဈေးအကြီးဆုံး အရန်ကစားသမား ဖြစ်လာနိုင်ပါတယ်။ ဘိုင်ယန်မြူးနစ်နဲ့ အဖွင့်ပွဲစဉ်မှာလည်း လူစာရင်းကနေ ချန်လှပ်ထားခြင်းခံရတာက သူ့ရဲ့အခြေအနေဟာ ပြောင်းလဲမှာမဟုတ်ဘူးလို့ ပြသနေပါတယ်လို့ ဖော်ပြနေပါတယ်။