အင်္ဂလန်အသင်းခေါင်းဆောင် ဟယ်ရီကိန်းကို ချီးကျူးလိုက်တဲ့ မော်ရင်ဟို
ဖီနာဘာချီနည်းပြသစ် မော်ရင်ဟိုက အင်္ဂလန်အသင်းခေါင်းဆောင် ဟယ်ရီကိန်းကို ချီးကျူးလိုက်ပြီး ဆုဖလားအောင်မြင်မှုအတွက်လည်း ဟောကိန်းထုတ်လိုက်ပါတယ်။ ဆောက်ဂိတ်ရဲ့အင်္ဂလန်အသင်းဟာ လာမယ့်ယူရို ၂၀၂၄ ဆုဖလားကို ရယူဖို့ ရေပန်းစားတဲ့အသင်းတွေထဲကတစ်သင်းအဖြစ်ရှိနေပါတယ်။
မော်ရင်ဟိုကတော့ အင်္ဂလန်အသင်းထက် ပေါ်တူဂီအသင်းကသာ ဗိုလ်စွဲဖို့ ရေပန်းစားတယ်လို့ ထင်မြင်နေပါတယ်။
ချဲလ်ဆီးနည်းပြဟောင်းက ကိန်းအနေနဲ့ အဆိုပါပြိုင်ပွဲကနေ ကြီးမားတဲ့အရာတွေမျှော်လင့်နိုင်တယ်လို့ ဆိုပါတယ်။
ကိန်းဟာ ၈ နှစ်ကြာ ထိပ်တန်းတိုက်စစ်မှူးတစ်ဦးအဖြစ် စွမ်းဆောင်ရည်ပြသထားနိုင်ခဲ့ပေမယ့် ဆုဖလားအောင်မြင်မှု မရသေးတာဖြစ်ပါတယ်။ အသက် ၃၀ အရွယ်ကစားသမားဟာ ဆုဖလားအောင်မြင်မှုတစ်ခုမှမရသေးပဲ မော်ရင်ဟိုတစ်ယောက် တော့တင်ဟမ်ကနေ ကာရာဘောင်ဖိုင်နယ်မတိုင်ခင် ၆ ရက်အလိုမှာ အထုတ်ခံခဲ့ရပါတယ်။
“ကိန်းက တော့တင်ဟမ် ၊ အင်္ဂလန်အသင်းတွေအတွက် ဂိုးတွေသွင်းယူနိုင်ခဲ့ပါတယ်။ ဘိုင်ယန်အတွက်လည်း ဂိုးတွေအများကြီးသွင်းယူပေးနိုင်ခဲ့ပါတယ်။ ကိန်းက တကယ့်ကိုလုံးဝပြီးပြည့်စုံတဲ့တိုက်စစ်မှူးတစ်ဦးဖြစ်သလို တစ်ကိုယ်ကောင်းလည်းမဆန်ပါဘူး။ ဂိုးတွေဖန်တီးပေးသလို အနောက်ထိဆင်းပြီးလည်း ဘောလုံးလက်ခံယူပါတယ်။ ကစားကွက်တည်ဆောက်တာ ၊ ဖိအားပေးတာ ၊ ကာကွယ်တာ အကုန်လုပ်နိုင်ပါတယ်။ သူ့အတွက် လိုအပ်နေတာက ဆုဖလားအောင်မြင်မှုပါပဲ။ သူက တော့တင်ဟမ်မှာတုန်းက ကျွန်တော့်ကစားသမားဖြစ်ခဲ့ပါတယ်။ သူနဲ့ဆုဖလားအောင်မြင်မှုရယူချင်ခဲ့တာပါ။ ဒါပေမယ့် ဖိုင်နယ်မတိုင်ခင် ၆ ရက်အလိုမှာ ကျွန်တော် အထုတ်ခံခဲ့ရပါတယ်။ ကျွန်တော်တို့မှာရှိခဲ့တဲ့ ယခင်မျိုးဆက်ကို မလေးစားတာမဟုတ်ပါူဘး။ ဒါပေမယ့် လူအင်အားနဲ့ အရည်အချင်းအရ ပေါ်တူဂီက အခုချိန်မှာ အကောင်းဆုံးအနေအထားမှာရှိနေပါတယ်။ ပေါ်တူဂီက ချန်ပီယံဖြစ်နိုင်ပါတယ်။ အဲ့တာနဲ့ပတ်သက်ပြီး ယုံကြည်မှုရှိသလို ဘယ်အသင်းကိုမဆို သူတို့အနိုင်ကန်နိုင်လိမ့်မယ်လို့ ယုံကြည်ပါတယ်။
“ပေါ်တူဂီက အကောင်းဆုံးအသင်းလို့ ကျွန်တော်မပြောပါဘူး။ ဒါပေမယ့် စပိန် ၊ အင်္ဂလန် ၊ ပြင်သစ် နဲ့ ဂျာမနီတို့ကလည်း သိပ်မကောင်းပါဘူး။ နည်းပြအတွက် အကောင်းဆုံးက ညာနောက်ခံလူ ၂ ယောက် ၊ ဘယ်နောက်ခံလူကောင်း ၂ ယောက် ၊ ကွင်းလယ်လူကောင်း ၂ ယောက်ရှိနေတာပါ။ ကျွန်တော်ပြောနေတာက ၂ ယောက်ပါပဲ။ ဘာလို့လဲဆိုတော့ အသင်းတစ်သင်းမှာ ၂၃ ယောက်ပဲရှိတာကြောင့်ပါ။ ဒါပေမယ့် အဲ့ထက်လည်းပိုနိုင်ပါတယ်။ အံ့သြစရာရှိတယ်ဆိုရင် ကျွန်တော် အံ့သြမှာပါ။ ပြင်သစ် နဲ့ ဂျာမနီတို့က အမြဲတမ်းအကောင်းဆုံးလုပ်ပါတယ်။ ပေါ်တူဂီနဲ့ အင်္ဂလန်က ပိုကောင်းပါတယ်။ ဒီအသင်း ၄ သင်းက တကယ်ကောင်းပါတယ်။ စပိန်အခြေအနေက မသေချာသေးပါဘူး။ ဒါပေမယ့် သူတို့မှာလည်း အရည်အချင်းကောင်းတွေရှိသလို အီတလီ ဒါမှမဟုတ် ဘယ်လ်ဂျီယံကလည်း အံ့သြစေနိုင်ပါတယ်”လို့ မော်ရင်ဟိုက ပြောကြားခဲ့ပါတယ်။
ယူရိုပြိုင်ပွဲကို လာမယ့်ဇူလိုင်လ ၁၄ ရက်နေ့မှာ စတင်မှာဖြစ်ပြီး ဂျာမနီက စကော့တလန် ၊ အင်္ဂလန်က ဆားဘီးယားနဲ့ရင်ဆိုင်ရမှာဖြစ်ပါတယ်။
