ခြေကျင်းဝတ်ဒဏ်ရာကနေပြန်လည်သက်သာလာပြီးနောက် ချဲလ်ဆီးကွင်းလယ်လူ ကိုင်စီဒိုတစ်ယောက် ပီအက်စ်ဂျီနဲ့ကလပ်ကမ္ဘာ့ဖလားဖိုင်နယ်ကို ပါဝင်ဖို့အသင့်ဖြစ်နေတယ်လို့ သိရပါတယ်။

အီကွေဒေါသားဟာ ဖလူမီးနီးစ်နဲ့ဆီမီးဖိုင်နယ်ပွဲညမှာ ခြေကျင်းဝတ်ဒဏ်ရာရရှိခဲ့တာဖြစ်ပြီး ဖိုင်နယ်ပွဲအတွက် ပါဝင်နိုင်ဖို့ မသေချာခဲ့တာဖြစ်ပါတယ်။ ဒါပေမယ့်လည်း ကြာသပတေးနေ့က လေ့ကျင့်ခန်းပြန်ဆင်းနိုင်ခဲ့တာကြောင့် လာမယ့်ဖိုင်နယ်မှာ ပါဝင်နိုင်ဖို့များနေတယ်လို့ ရိုမာနိုက အတည်ပြုပါတယ်။ မာရက်စ်ကာကလည်း ကိုင်စီဒိုတစ်ယောက် လာမယ့်ဖိုင်နယ်မှာ ပါဝင်မယ်လို့ အတည်ပြုခဲ့ပါတယ်။ ကိုင်စီဒိုဟာ ချဲလ်ဆီးအသင်းရဲ့ကလပ်ကမ္ဘာ့ဖလား ၆ ပွဲမှာ ၄ ပွဲကို ပွဲဦးထွက်ပါဝင်ထားခဲ့ပြီး သူပါဝင်လာမှုက ပီအက်စ်ဂျီအသင်းကွင်းလယ်ကို ပြန်လည်စိုးမိုးနိုင်မယ့်အချက်လည်းဖြစ်ပါတယ်။

သတင်းထောက်တွေကို မာရက်စ်ကာပြောကြားရာမှာ “မှန်ပါတယ်။ ကိုင်စီဒိုက ကျွန်တော်တို့အတွက် အရေးပါတဲ့ကစားသမားပါ။ ဒီမနက်ခင်းမှာ သူလေ့ကျင့်ခန်းအပြည့်အဝမဆင်းနိုင်သေးပါဘူး။ ဒါပေမယ့် လာမယ့်တနင်္ဂနွေနေ့မှာ သူပါဝင်လာမယ်လို့ မျှော်လင့်ပါတယ်”လို့ ဖြေကြားခဲ့ပါတယ်။ ချဲလ်ဆီးဟာ လာမယ့် ၂၀၂၄ - ၂၅ ရာသီမတိုင်ခင် ဆုဖလားတစ်လုံးထပ်မံရယူနိုင်ဖို့ ပစ်မှတ်ထားနေပါတယ်။