အာဂျင်တီးနားအသင်းအတွက် သူ့ရဲ့နောက်ဆုံးအိမ်ကွင်းပွဲစဉ်ဖြစ်နိုင်ခြေများတဲ့ပွဲစဉ်အပြီးမှာ လီယွန်နယ် မက်ဆီက သူ့ရဲ့လက်ရွေးစင်ကစားသမားဘဝနဲ့ပတ်သက်လို့ စိတ်ခံစားမှုအပြည့်နဲ့ ရေးသားထားတာကြောင့် ကမ္ဘာ့ဖလားဝင်ခွင့်ရအသင်းရဲ့ အနာဂတ်အပေါ် သံသယတွေ ပိုမိုမြင့်တက်လာခဲ့ပါတယ်။ ကြာသပတေးနေ့က ဗင်နီဇွဲလားကို ၃-၀ ဂိုးနဲ့ အနိုင်ရတဲ့ပွဲမှာ မက်ဆီက ၂ ဂိုး သွင်းယူခဲ့ပေမယ့် ပွဲအပြီးမှာတော့ လာမယ့် ကမ္ဘာ့ဖလားမှာ ပါဝင်ဖို့ မသေချာကြောင်း အရိပ်အမြွက် ပြောကြားခဲ့ပါတယ်။

ကမ္ဘာ့ဖလားခြေစစ်ပွဲမှာ နောက်ဆုံးအိမ်ကွင်းပွဲစဉ်ကစားပြီးတဲ့နောက် မက်ဆီဟာ ၃ နှစ်အကြာမှာ ကာတာမှာ ရရှိခဲ့တဲ့ ဆုဖလားကို ကာကွယ်မလားဆိုတာကို ရှင်းရှင်းလင်းလင်း တုံ့ပြန်ခြင်းမရှိခဲ့တဲ့အတွက် သူ့ရဲ့ကစားသမားဘဝ မရေမရာဖြစ်ခဲ့ရပါတယ်။ အခုဆိုရင်တော့ မက်ဆီက လူမှုကွန်ရက်စာမျက်နှာမှာ ပရိသတ်တွေကို စိတ်ခံစားမှုပြင်းပြင်းနဲ့ မျှဝေခဲ့ပြီး လက်ရွေးစင်အသင်းနဲ့အတူ သူ့ရဲ့အနာဂတ်အပေါ် သံသယတွေ ပိုမိုဖြစ်ပေါ်လာစေပါတယ်။ အသက် ၃၈ နှစ်အရွယ် မက်ဆီဟာ သူ့ရဲ့ကလပ်အသင်းအတွက် ကြံ့ခိုင်မှုရှိနေစေချင်တာကြောင့် လာမယ့်တစ်ပတ်မှာ အီကွေဒေါအသင်းနဲ့ နောက်ဆုံးကစားရမယ့် ခြေစစ်ပွဲကိုလည်း လွဲချော်မှာ ဖြစ်ပါတယ်။

မက်ဆီက သူ့ရဲ့အင်စတာဂရမ်မှာ ‘စိတ်ခံစားမှုတွေကြောင့် စကားတွေ ထွက်မလာတော့ဘဲ တကယ့်ကို အထူးခြားဆုံးညတစ်ညပါပဲ။ လူတိုင်းကို ကျေးဇူးတင်ပါတယ်။ ဘာပဲဖြစ်ဖြစ် ဘယ်လိုအနာဂတ်ရှိလာမလဲဆိုတာ ဘုရားသခင်သာ သိပါတယ်…အာဂျင်တီးနားကို ရှေ့ဆက်သွားကြစို့’လို့ ရေးသားခဲ့ပါတယ်။

မက်ဆီဟာ စက်တင်ဘာလ ၁၄ ရက်နေ့မှာ MLS ပွဲစဉ်အဖြစ် ရှာလော့အသင်းနဲ့ အရေးပါတဲ့ပွဲစဉ်ကို ရင်ဆိုင်ရမယ့်အတွက် အင်တာ မိုင်ယာမီအသင်းမှာ ပွဲပြန်ကစားရပါတော့မယ်။ ကမ္ဘာ့ဖလားမှာ ပါဝင်ကစားမယ့် သူ့ရဲ့ နောက်ဆုံးဆုံးဖြတ်ချက်ကို ဘယ်အချိန်မှာ ချမှတ်မလဲဆိုတာကတော့ စောင့်ကြည့်ရပါဦးမယ်။