စနေနေ့က ဝုဖ်ဘတ်အား ၃-၂ ဂိုးဖြင့် အနိုင်ရရှိခဲ့ပြီးနောက် သူ့ရဲ့သူငယ်ချင်း အဲရစ်ဒိုင်ယာကို ဘိုင်ယန်မြူးနစ်မှာ ဆက်ရှိစေချင်ပါတယ်လို့ ကိန်းက ပြောကြားလိုက်ပါတယ်။ ၂၀၂၄ ခုနှစ် ဇန်နဝါရီတွင် တော့တင်ဟမ်ကနေ အငှားဖြင့်ရောက်လာခဲ့ပြီးနောက် ဒိုင်ယာရဲ့ ဘိုင်ယန်မြူးနစ်နှင့် စာချုပ်က နွေရာသီမှာ သက်တမ်းကုန်ဆုံးမှာဖြစ်ပါတယ်။

ဂျာမနီသို့ရောက်လာကတည်းက သူဟာ ၃၁ ပွဲကစားထားပေမယ့် မကြာသေးမီက သူ့ရဲ့ပွဲထွက်ခွင့်တွေဟာ နည်းပါးခဲ့ပြီး ဒီရာသီမှာ လိဂ်ပွဲ ၃ ပွဲသာ ပွဲထွက် ကစားထားရတာဖြစ်ပါတယ်။ ဘိုင်ယန်ရဲ့ပွဲထွက်စာရင်းမှာ ပါဝင်ဖို့အတွက် အင်္ဂလန်သားက ရုန်းကန်နေရတာဖြစ်ပြီး ဗဟိုခံစစ်ရဲ့ ပွဲထွက်နေရာတွင် အူပါမီကာနိုနှင့် ကင်မင်ဂျေတို့ရဲ့ရောက်မှာသာ ရှိနေပါတယ်။

ကွန်ပနီရဲ့ခံစစ်မှာ ဒိုင်ယာက အရေးပါတဲ့သူတစ်ဦးအဖြစ် ရှိနေဆဲဖြစ်ကြောင်း ကိန်းက ပြောကြားထားပြီး အခွင့်အရေးတွေရှိနေသေးကြောင်း ပြောထားပါတယ်။ တော့တင်ဟမ်အသင်းဖော်ဟောင်းကို ဘိုင်ယန်မြူးနစ်မှာရှိဖို့ သက်တမ်းတိုးစေချင်သလားလို့ မေးရာ ကိန်းက "အဲရစ်က တကယ်ကိုကောင်းတဲ့ ကစားသမားပါ။ သူက စိတ်ရှည်စွာဖြင့် စောင့်နေတာပါ" "ဒီရာသီမှာ အူပါမီကာနိုနှင့် ကင်မင်ဂျေတို့ကလည်း ခြေစွမ်းပြနေတာကြောင့် အဲရစ်ကသူ့ရဲ့အချိန်ကို စောင့်ရမှာဖြစ်ပါတယ်"

"ပြီးခဲ့တဲ့ ၂ ပွဲမှာ သူက ပါဝင်ခဲ့ရပြီး အကောင်းဆုံးလုပ်ခဲ့ပါတယ်။ ကျွန်တော်တို့က clean sheet ၂ ကြိမ်ရရှိခဲ့ပါတယ်။ ဒါကြောင့် သူ့ကို အသင်းမှာဆက်ရှိစေချင်ပါတယ်" "ဒါက သူနဲ့ကလပ်ကြားကကိစ္စဖြစ်ပြီး သူနဲ့မည်သည့်စကားကိုမှ မပြောရသေးကာ ဒါကြောင့် ကျွန်တော်တို့ စောင့်ကြည့်ရမှာဖြစ်ပါတယ်" "ကစားရတဲ့အချိန်မှာ သူက အကောင်းဆုံးလုပ်ဆောင်သူပါ။ ကျွန်တော်တို့ ၂ ဦးက တွဲဖက်မိပါတယ်။ သူ့ရဲ့အနာဂတ်အကြောင်းကိုတော့ မပြောဖြစ်ပါဘူး။ ဒါဟာ သူနဲ့ကလပ်ကြားက ကိစ္စဖြစ်ပါတယ်" လို့ ဖြေပါတယ်။

ဒိုင်ယာလိုပဲ မူစီယာလာ၊ ကင်မစ်ချ်တို့ရဲ့ စာချုပ်တွေက သက်တမ်းကုန်ဆုံးတော့မှာဖြစ်ပြီး ကိန်းကတော့ အားလုံးကို အသင်းမှာ ဆက်ရှိနေစေချင်ပါတယ်။ "သူတို့တွေက စာချုပ်မှာလက်မှတ်ထိုးဖို့ မျှော်လင့်မိပါတယ်။ ဒါမှသာ ကျွန်တော်တို့က ဒီရာသီမှာ လုပ်ခဲ့တဲ့အတိုင်း ဆက်သွားနိုင်မှာပါ" လို့ ကိန်းက ပြောပါတယ်။

၂၀၁၄ ခုနှစ်မှာ တော့တင်ဟမ်သို့ ရောက်လာခဲ့တဲ့ ဒိုင်ယာဟာ မြောက်လန်ဒန်ကလပ်မှာ ၁၀ နှစ်တာ ကစားခဲ့တာဖြစ်ပါတယ်။ ပြီးခဲ့တဲ့ရာသီ ပိုစတီကိုဂလူရဲ့အသင်းမှာ နေရာမရခဲ့တာကြောင့် သူ့ရဲ့သူငယ်ချင်းနှင့် ဂျာမနီမှာ ပြန်လည်ပေါင်းစည်းခဲ့ပြီး ဘိုင်ယန်မှာအသားကျအောင် ကူညီပေးခဲ့တဲ့ ကိန်းကိုလည်း သူက ကျေးဇူးတင်ကြောင်း ပြောထားပါတယ်။ "ဒီရောက်တဲ့အချိန်မှာ ဟယ်ရီက ကျွန်တော့်ကို အများကြီးကူညီပေးပါတယ်။ ဒါက အားလုံးကို လွယ်ကူသွားစေတာပါ" လို့ ပြီးခဲ့တဲ့နှစ် ဖေဖော်ဝါရီတုန်းက ပြောပါတယ်။

"ကလပ်က သူအားလုံးကလည်း ကျွန်တော့်ကို ကူညီပါတယ်။ သူတို့လက်ရှိအချိန်အထိ ကျွန်တော့်ကို ကူညီပေးနေတုန်းပါ။ အဲ့ဒီအတွက်လည်း အရမ်းကို ဝမ်းသာမိပါတယ်" လို့ ဒိုင်ယာက ပြောပါတယ်။ကိန်းနှင့် ဒိုင်ယာတို့ဟာ ၂၀၁၂ ခုနှစ်တွင် အင်္ဂလန် ယူ ၁၉ အသင်းအတွက် ပထမဆုံးအကြိမ်အဖြစ် အတူကစားပေးခဲ့ကြပြီး အဲ့ဒီကတည်းက ဘိုင်ယန်၊ တော့တင်ဟမ်နှင့် အင်္ဂလန်တို့ရဲ့ သက်တမ်းလိုက်အသင်းတွေမှာ ၃၈၆ ပွဲအထိ အတူတူကစားခဲ့ကြတာဖြစ်ပါတယ်။