မန်ချက်စတာယူနိုက်တက်အသင်းခေါင်းဆောင်ဘရူနိုဖာနန်ဒက်စ်နဲ့ ရီးရဲလ်မက်ဒရစ်တို့အကြား အပြောင်းအရွှေ့ဆိုင်ရာဖြစ်နိုင်ခြေသတင်းတစ်ရပ် ထွက်ပေါ်နေပေမယ့် နည်းပြအာမိုရင်ကတော့ သူတို့ရဲ့ကပ္ပတိန် ဘယ်မှမသွားပါဘူးလို့ တနင်္လာနေ့မှာ ပြောကြားခဲ့ပါတယ်။

၂၀၂၀ ပြည့်နှစ်၊ စပို့တင်းလစ္စဘွန်းမှ မန်ချက်စတာမြေဆီ ရောက်ရှိလာပြီးနောက် ၂၇၇ ပွဲကစား၊ ၉၅ ဂိုးအထိ သွင်းယူပေးထားတဲ့ အသက်-၃၀ နှစ်အရွယ်ပေါ်တူဂီကြယ်ပွင့်က အိုးထရက်ဖို့ဒ်နဲ့ ၂၀၂၇ ခုနှစ်အထိ စာချုပ်သက်တမ်းရှိနေပါတယ်။ ဒါပေမယ့် လတ်တလောမှာ စပိန်ဘီလူးကြီးရီးရဲလ်မက်ဒရစ်နဲ့ ဘရူနိုဖာနန်ဒက်စ်တို့အကြား ပေါင်သန်း ၉၀ တန် အပြောင်းအရွှေ့လှုပ်ရှားမှုရှိနေတယ်ဆိုပြီး သတင်းတွေ ထွက်ပေါ်ခဲ့ပါတယ်။

သရဲနီနည်းပြအာမိုရင်က “ No. ဒါ မဖြစ်နိုင်ပါဘူး။ အဆိုးဝါးဆုံးဘောလုံးရာသီတစ်ခု ဖြစ်နေချိန်မှာတောင် အထင်ကြီးလောက်စရာကောင်းအောင် စွမ်းဆောင်ပြထားလို့ ဒီအသင်းမှာ ဘရူနိုဖာနန်ဒက်စ်ကို ဆက်ရှိနေစေချင်ပါတယ်။ကျွန်တော်တို့ ပရီးမီးယားလိဂ်ဆုဖလားကို နောက်တစ်ကြိမ်ပြန်ရရှိချင်ပါတယ်။ဒါကြောင့် ကျွန်တော်တို့နဲ့အတူ ဆက်ရှိနေမယ့် အကောင်းဆုံးကစားသမားတွေကို လိုချင်ပါတယ်။

သူ့အသက် ၂၉ နှစ်လို့ ထင်ပါတယ်။ ဒါပေမယ့် သူက ရာသီတိုင်း ၅၅ ပွဲလောက် ကစားပေးနေလို့ ငယ်ရွယ်နုပျိုနေဆဲပါပဲ။ သူ့ရဲ့ဂိုးဖန်တီးမှုနဲ့ သွင်းဂိုးတွေက အနည်းဆုံး ၃၀ လောက်ရှိပြီဆိုတော့ ဘရူနိုဖာနန်ဒက်စ်က ကျွန်တော်တို့လိုချင်တဲ့ ကစားသမားမျိုးပါ။ ဒါကြောင့် သူ ဘယ်ကိုမှသွားမှာ မဟုတ်ပါဘူး။အခြေအနေတွေဆိုတာလည်း ကျွန်တော်တို့ထိန်းချုပ်မှုအောက်မှာပဲ ရှိပါတယ်။ ဘရူနိုဖာနန်ဒက်စ်ကိုယ်တိုင်လည်း ဒီအသင်းမှာ ပျော်ရွှင်နေတယ်လို့ ကျွန်တော်ခံစားမိပါတယ်”လို့ ပြောပါတယ်။