လာမယ့်နွေရာသီမှာကျင်းပမယ့် အသွင်သစ်ကလပ်ကမ္ဘာ့ဖလားပြိုင်ပွဲက ချဲလ်ဆီးကစားသမားတွေအတွက်  ကြီးမားတဲ့စိတ်အားလှုံ့ဆော်မှုတစ်ခုဖြစ်တယ်လို့ နည်းပြမာရက်စ်ကာ ယုံကြည်နေပါတယ်။ ဥရောပအခြေစိုက်ကလပ်အသင်း ၁၂ ခုအပါအဝင် ပြိုင်ပွဲဝင်ကလပ်အသင်း ၃၂ ခုအထိ ပါဝင်မယ့် အခုပြိုင်ပွဲကို ဇွန်၊ ဇူလိုင်လတွေအတွင်း အမေရိကန်နိုင်ငံတလွှားနေရာဒေသတွေမှာ လက်ခံကျင်းပသွားဖို့ စီစဉ်ထားပါတယ်။

အနောက်လန်ဒန်သားတွေက ၂၀၂၁ ခုနှစ်၊ ပေါ်တိုမြို့ချန်ပီယံလိဂ်ဗိုလ်လုပွဲမှာ မန်စီးတီးကို ၁-၀ ဂိုးဖြင့် အနိုင်ရရှိပြီးနောက် အခုပြိုင်ပွဲဆီ ဝင်ရောက်ယှဉ်ပြိုင်ခွင့် ရရှိခဲ့ပါတယ်။ ချဲလ်ဆီးက အုပ်စု D မှာ ဖလာမင်ဂို၊ Club Leon၊ Esperance Sportive de Tunis တို့နဲ့အတူကျရောက်နေပြီး အုပ်စုအဖွင့်ပွဲစဉ်ကို ဇွန် ၁၆ ရက်၊ အတ္တလန်တာမြို့မှာ ယှဉ်ပြိုင်ကစားသွားရပါမယ်။

မာရက်စ်ကာလက်အောက် အခုဘောလုံးရာသီမှာ အဓိကဆုဖလားဆွတ်ခူးနိုင်ခြင်းမရှိသေးတဲ့ ချဲလ်ဆီးအတွက် ကလပ်ကမ္ဘာ့ဖလားပြိုင်ပွဲကို သူ့ရဲ့ပထမဆုံးဆုဖလားကိုင်မြှောက်နိုင်မယ့် ပြီးပြည့်စုံတဲ့ အခွင့်အရေးတစ်ခုအဖြစ် အီတာလျံသားနည်းပြကိုယ်တိုင် ရှုမြင်နေပါတယ်။

မာရက်စ်ကာက “ ဒီပြိုင်ပွဲကို စိတ်အားလှုံ့ဆော်မှုတွေရဲ့အရင်းအမြစ်တစ်ခုအဖြစ် ရှုမြင်သွားဖို့ လိုအပ်ပါတယ်။ အရင်တုန်းကလည်း ကျွန်တော်ပြောခဲ့ဖူးပါတယ်။ ချဲလ်ဆီးမှာရှိနေပြီဆိုရင် ကိုယ့်ရဲ့ရည်မှန်းချက်က တက်နိုင်သမျှအောင်ပွဲတွေ ဆွတ်ခူးသွားနိုင်ဖို့ပါပဲ။ ပြိုင်ပွဲကျင်းပမယ့်ကာလဆီ ရောက်ရှိသွားပြီဆိုရင် ကျွန်တော်တို့ရဲ့ရည်မှန်းချက်တွေအနက်တစ်ခုက ဒီပြိုင်ပွဲမှာ အောင်မြင်မှုဆွတ်ခူးနိုင်အောင် ကြိုးစားသွားဖို့ဆိုတာ ဖြစ်လာပါလိမ့်မယ်။

ကျွန်တော်လည်း ပျော်ရွှင်ကျေနပ်မိပါတယ်။ ခင်ဗျားတို့လည်း ပြောဖူးပါတယ်။ ဒီပြိုင်ပွဲက ကမ္ဘာတစ်ဝန်းမှာရှိတဲ့ ထိပ်တန်းကလပ်အသင်း ၃၂ ခုကို အတူတကွစုစည်းယှဉ်ပြိုင်စေတဲ့ ပြိုင်ပွဲတစ်ခုဖြစ်တယ်ဆိုတာလေ။ ဒါကြောင့် စိတ်လှုပ်ရှားစရာတွေ ယူဆောင်လာပေးမယ့် ပြိုင်ပွဲကြီးတစ်ရပ် ဖြစ်ပါတယ်။ ပြီးတော့ အခြားထိပ်တန်းနည်းပြတွေ၊ အခြားထိပ်တန်းကမ္ဘာ့အဆင့်ကလပ်အသင်းတွေနဲ့ ဆုံတွေ့ရမယ့် အခွင့်အလမ်းတစ်ခုလည်း ရှိနေပြန်ပါတယ်”လို့ ပြောပါတယ်။

ချဲလ်ဆီးက ကလပ်ကမ္ဘာ့ဖလားချန်ပီယံဆုကို ၂၀၂၂ ခုနှစ်မှာ ဆွတ်ခူးခဲ့ဖူးပါတယ်။ ကလပ်အသင်းနဲ့နီးစပ်တဲ့ သတင်းရင်းမြစ်တွေရဲ့အဆိုအရ ချဲလ်ဆီးအသင်းပိုင်ရှင်တွေဟာ အခုနှစ်ပြိုင်ပွဲကို အဓိကအကြောင်းပြချက် နှစ်ခုနဲ့အတူ အလေးအနက်ရှုမြင်ထားတယ်လို့ သိရပါတယ်။

အခုလအစောပိုင်းသတင်းတွေအရ ကမ္ဘာ့ဘောလုံးအဖွဲ့ချုပ်(ဖီဖာ)အနေဖြင့် ပြိုင်ပွဲဝင်ကလပ်အသင်းတွေကို ဆုကြေးငွေဒေါ်လာ ၁ ဘီလျံအထိ ချီးမြှင့်ပေးဖွယ်ရှိတယ်လို့ သိရပြီး ချဲလ်ဆီးအတွက်လည်း ကမ္ဘာလုံးဆိုင်ရာ ဘောလုံးပရိသတ်တွေကို ဆွဲဆောင်နိုင်မယ့် အခွင့်အရေးတစ်ခုလည်း ရှိလာနိုင်ပါတယ်။မာရက်စ်ကာကလည်း အခုပြိုင်ပွဲမှာ အသင်းကြယ်ပွင့် ကိုးလ်ပယ်လ်မာ ပါဝင်နိုင်မယ့်အလားအလာအပေါ် အသေးစိတ်ရှင်းပြသွားခဲ့ပါတယ်။ အသက်-၂၂ နှစ်အရွယ်ကစားသမားက ယူရိုပြိုင်ပွဲမှာ အင်္ဂလန်အသင်းကို ကိုယ်စားပြုကစားနေခဲ့လို့ ပြီးခဲ့တဲ့နှစ်၊ ချဲလ်ဆီးအသင်းရဲ့အမေရိကန်ရာသီကြိုခရီးစဉ်ကို လွဲချော်ခဲ့ပါတယ်။

ဒါပေမယ့် အခုတစ်ကြိမ်မှာတော့ အင်္ဂလန်လက်ရွေးစင်ကစားသမားက ချဲလ်ဆီးနဲ့အတူ အမေရိကန်မြေဆီ ရောက်ရှိလာနိုင်တယ်လို့ ယူဆရပါတယ်။ မာရက်စ်ကာက “ အချိန်မရွေးထူးခြားမှုတစ်ခုခုကို ဖန်တီးပေးနိုင်မယ့် အကောင်းဆုံး၊ ထိပ်တန်းကစားသမားတွေနဲ့အတူ ကိုးပယ်လ်မာ ရှိနေပါလိမ့်မယ်။

သူက ပြီးခဲ့တဲ့နွေရာသီ၊ အမေရိကန်ရာသီကြိုခရီးစဉ်မှာ ကျွန်တော်တို့နဲ့အတူ မရှိခဲ့ပါဘူး။ ဒါကြောင့် အခုတစ်ကြိမ်မှာတော့ မြောက်အမေရိကပရိသတ်တွေဆီ မိတ်ဆက်ပေးနိုင်ဖို့၊ အမေရိကန်ဘောလုံးလောကရဲ့ အငွေ့အသက်တွေကို ခံစားနိုင်ဖို့ သူ့အတွက် အခွင့်အရေးတစ်ခု ရှိလာပါလိမ့်မယ်”လို့ ပြောပါတယ်။