သတင်းတွေအရ မန်စီးတီးအသင်းဟာ ဒီဘရိုင်းနေရာအတွက် လိုင်ယွန်ကွင်းလယ်လူ ချာကီကိုခေါ်ယူနိုင်ဖို့ ပုဂ္ဂိုလ်ရေးသဘောတူညီမှုရရှိခဲ့ပြီလို့ သိရပါတယ်။ ရိုမာနိုရဲ့အဆိုအရ အသက် ၂၁ နှစ်သားဟာ ဂွါဒီယိုလာရဲ့နည်းစနစ်ပိုင်းမှာ အစိတ်အပိုင်းတစ်ခုအဖြစ် ပါဝင်နိုင်ဖို့ မျှော်လင့်နေတယ်လို့ ဆိုပါတယ်။

၂ သင်းကြားအပြောင်းအရွှေ့အတွက် ဆွေးနွေးနေတာက အဆင်ပြေနေပြီး လျင်လျင်မြန်မြန်တိုးတက်လာတယ်လို့ သိရပါတယ်။ ဆွေးနွေးမှုတွေက နောက်ဆုံးအဆင့်ကိုရောက်နေပြီး စီးတီးဘက်က နာရီပိုင်းအတွင်းမှာ ကနဦးကမ်းလှမ်းမှုပြုလုပ်ဖွယ်ရှိနေပါတယ်။ ချာကီဟာ လိုင်ယွန်အသင်းနဲ့ ပေါင် ၂၅ သန်းစာချုပ်ဖျက်သိမ်းကြေးရှိနေတာဖြစ်ပြီး စီးတီးဘက်က အဆိုပါစာချုပ်ဖျက်သိမ်းကြေးကို ပေးချေဖွယ်ရှိနေပါတယ်။

စီးတီးဟာ ပြီးခဲ့တဲ့ရာသီတုန်းက ဖလားလက်မဲ့ရာသီကိုဖြတ်သန်းခဲ့ရသလို အဆင့် ၃ နေရာမှာသာ ရပ်တည်နိုင်ခဲ့ပါတယ်။ ဒါ့အပြင် အက်ဖ်အေဖလားဖိုင်နယ်မှာလည်း အံ့အားသင့်ဖွယ် ပဲလေ့စ်ကို အရေးနိမ့်ခဲ့ပါတယ်။ စီးတီးဂန္ထဝင်ကွင်းလယ်လူ ဒီဘရိုင်းက အခုနွေရာဦမှာ အသင်းကနေထွက်ခွာမှာဖြစ်ပြီး ချာကီအနေနဲ့ ဘယ်လ်ဂျီယံသားနေရာမှာ ဆက်ခံရမှာဖြစ်ပါတယ်။

စီးတီးဟာ အေစီမီလန်စတား ရိုင်ဂျန်ဒါကိုလည်း ပေါင် ၅၉ သန်းနဲ့ခေါ်ယူဖို့ သဘောတူညီမှုရရှိထားပါတယ်။ နယ်သာလန်သားဟာ ချာကီနဲ့အတူ ဂွါဒီယိုလာရဲ့ကွင်းလယ်မှာ အသုံးတော်ခံရမှာဖြစ်ပါတယ်။ ဂွါဒီယိုလာဘက်က ကွင်းလယ်ပိုင်းအပြင် နောက်ခံလူနေရာကိုပါအပြောင်းအလဲလုပ်ဖို့ ပြင်ဆင်နေပါတယ်။ စီးတီးဘက်က ညာနောက်ခံလူနေရာမှာ နယူးကာဆယ်စတား လီဗရာမန်တိုကို ပစ်မှတ်ထားနေသလို ဝုဗ်ဘယ်နောက်ခံလူ အစ်နိုရီကိုလည်း ခေါ်ယူချင်နေပါတယ်။