ခရစ္စတယ်ပဲလေ့စ်ထံ စာချုပ်ဖျက်သိမ်းကြေး မပေးဆောင်ရဘဲ အိုလီဆီကို ခေါ်ယူနိုင်မယ်လို့ ယုံကြည်နေတဲ့ ချဲလ်ဆီး
ချဲလ်ဆီးအသင်းဟာ ခရစ္စတယ်ပဲလေ့စ့်ကြယ်ပွင့် မိုက်ကယ်အိုလီဆီကို ခေါ်ယူဖို့ ရေပန်းအစားဆုံးဖြစ်နေပြီး သတင်းတွေအရ ကစားသမားရဲ့စာချုပ်ဖျက်သိမ်းကြေးကို ပေးဆောင်ခြင်းမရှိဘဲ ခေါ်ယူနိုင်တော့မှာဖြစ်တယ်လို့သိရပါတယ်။
ကြာသပတေးနေ့မှာ ချဲလ်ဆီးဟာ တောင်ပံမှာသာမက ကွင်းလယ်တိုက်စစ်နေရာမှာ ပါကစားနိုင်တဲ့ အိုလီဆီကိုခေါ်ယူဖို့ ခရစ္စတယ်ပဲလေ့စ်နဲ့ ဖြစ်နိုင်ချေရှိတဲ့ အပြောင်းအရွှေ့အတွက် ဆက်သွယ်ခဲ့တယ်လို့ သတင်းတွေကဖော်ပြထားပါတယ်။ ကစားသမားကို ခေါ်ယူဖို့ ချဲလ်ဆီးရဲ့တစ်ခုတည်းသောပြဿနာမှာ ပေါင်သန်း ၆၀ တန်ကြေးရှိစာချုပ်ဖျက်သိမ်းကြေးဖြစ်နေပြီး စတန်းဖို့ဒ်ဘရစ်ချ်အသင်းဟာ လက်ရှိအချိန်မှာတော့ ပြောင်းရွှေ့ကြေးမပေးချေရဘဲ အိုလီဆီကိုခေါ်ယူဖို့ ကြိုးစားနေတာဖြစ်ပါတယ်။
သို့သော်လည်း နယူးကာဆယ်နဲ့ ဘိုင်ယန်မြူးနစ်တို့က အိုလီဆီကိုခေါ်ယူဖို့ ကြိုးစားနေကြတာကြောင့် ချဲလ်ဆီးအတွက် ခက်ခဲတဲ့ပြိုင်ဆိုင်မှုတွေရှိလာနိုင်ပြီး ယူနိုက်တက်နဲ့ မန်စီးတီးတို့ကလည်း ကစားသမားကို စိတ်ဝင်စားနေတယ်လို့ ကောလာဟလတွေ ထွက်ပေါ်နေပါသေးတယ်။ သို့သော်လည်း သတင်းတွေအရ ချဲလ်ဆီးဟာ ချန်ပီယံလိဂ်ဝင်ခွင့်မရသော်လည်း ကစားသမားရဲ့လစာကို ချန်ပီယံလိဂ်ဝင်ခွင့်ရအသင်းတွေထက် ပိုပေးစရာမလိုဘူးလို့ ယုံကြည်နေကြောင်းသိရပါတယ်။ ဒါ့အပြင် ချဲလ်ဆီးဟာ အိုလီဆီကိုခေါ်ယူဖို့ ရေပန်းအစားဆုံးအသင်းအဖြစ်ရပ်တည်နေဆဲဖြစ်ပါတယ်။
ချဲလ်ဆီးအနေနဲ့ အိုလီဆီရဲ့စာချုပ်ဖျက်သိမ်းကြေးကို ရှောင်လွှဲနိုင်ဖို့ ကြိုးစားတဲ့အနေနဲ့ ကစားသမားကို ခေါ်ယူမယ်ဆိုရင် အသင်းရဲ့ကစားသမားအချို့ကို အလဲအထပ်အနေနဲ့ လက်လွှတ်သွားရမှာဖြစ်ပါတယ်။ အလဲအထပ်လုပ်ဖို့ ပြင်ဆင်ထားတဲ့ ချဲလ်ဆီးရဲ့ကစားသမားတွေထဲမှာ ချာလိုဘက်၊ ဘရိုဂျာနဲ့ ကာဆာဒီတို့ပါဝင်နေတယ်လို့သိရပါတယ်။
အပြောင်းအရွှေ့ဂုရု ဖာဘရီဇီယိုရိုမာနိုရဲ့အဆိုအရ ချဲလ်ဆီးရဲ့မစ်ရှင်မှာ အိုလီဆီကို ခေါ်ယူနိုင်ဖို့ဆိုရင် ကစားသမားနဲ့ပုဂ္ဂိုလ်ရေးဆိုင်ရာ သဘောတူညီချက်တွေကို ရယူပြီးနောက်မှ ခရစ္စတယ်ပဲလေ့စ်နဲ့ ညှိနှိုင်းသွားမှာဖြစ်တယ်လို့သိရပါတယ်။ အိုလီဆီဟာ ၂၀၂၁ ခုနှစ်မှာ ရီးဒင်းမှ ခရစ္စတယ်ပဲလေ့စ်သို့ပြောင်းရွှေ့လာခဲ့ပြီး စုစုပေါင်း ပွဲ ၉၀ ကစားထားကာ ၁၆ ဂိုးသွင်းပြီး ဂိုးဖန်တီးမှု ၂၅ ကြိမ်အထိပြုလုပ်ထားနိုင်ပါတယ်။
တောင်ပံကစားသမားဟာ ချဲလ်ဆီးအသင်းရဲ့လူငယ်အသင်းမှာ ကစားခဲ့ဖူးသလို၊ မန်စီးတီးရဲ့အကယ်ဒမီမှာလည်း ကစားခဲ့ဖူးပြီး နောက်ပိုင်းမှာတော့ ရီးဒင်းသို့ပြောင်းရွှေ့သွားခဲ့တာဖြစ်ပါတယ်။
