မန်ချက်စတာယူနိုက်တက်အသင်းခေါင်းဆောင် ဘရူနိုဖာနန်ဒက်စ်က သူ့အနေနဲ့ အိုးလ်ထရက်ဖို့ဒ်မှထွက်ခွာပါက ကစားသမားဘဝအဆုံးမသတ်မီ အသင်းဖော်ဟောင်း ဂျူအန်မာတာရှိရာ ဩစတြေးလျလိဂ်သို့ ပြောင်းရွှေ့ဖွယ်ရှိကြောင်း အရိပ်အမြွက်ပြောကြားလာခဲ့ပါတယ်။ အသက်-၃၁ နှစ်အရွယ်ပေါ်တူဂီလက်ရွေးစင်ဟာ ယူနိုက်တက်နဲ့ ၂၀၂၇ ခုနှစ်အထိစာချုပ်သက်တမ်း ကျန်ရှိနေသေးပေမယ့် စာချုပ်သစ်ချုပ်ဆိုခြင်းမရှိပါက ဩစတြေးလျလိဂ်သို့ပြောင်းရွှေ့သွားဖွယ် ရှိနေပါတယ်။ ဖာနန်ဒက်စ်အနေနဲ့ ယခုဇန်နဝါရီအပြောင်းအရွှေ့ကာလမှာတော့ ယူနိုက်တက်ကနေ ထွက်ခွာဖို့ အစီအစဉ်မရှိပေမယ့် ကစားသမားဘဝ နောက်ဆုံးအချိန်တွေမှာ ယူနိုက်တက်အသင်းဖော်ဟောင်း မာတာနဲ့ချိတ်ဆက်သွားဖွယ်ရှိနေတာဖြစ်ပါတယ်။ 

အသက်-၃၆ နှစ်အရွယ်မာတာဟာ ယခုအခါမှာတော့ ဩစတြေးလျအေလိဂ်ကလပ် ဝက်စ်တန်းဆစ်ဒနေးဝမ်ဒါရာစ်မှာ ကစားနေပြီး ကျေနပ်စရာကောင်းတဲ့ ဘဝနေထိုင်မှုပုံစံနဲ့ ဖြတ်သန်းနေတယ်လို့သိရပါတယ်။ ဖာနန်ဒက်စ်က “မာတာက ကျွန်တော့်ကို ဩစတြေးလျမှာ နေထိုင်ရတဲ့ပုံစံကို ဗီဒီယိုနဲ့တကွ ပို့လာခဲ့ပါတယ်။ အဲဒီမှာနေရတဲ့ နေထိုင်မှုပုံစံ၊ ကမ်းခြေမှာနေရတဲ့ဘဝ၊ အားကစားကွင်းတွေရဲ့အခြေအနေနဲ့ သူ့ကလပ်ရဲ့ အခြေအနေတွေအကြောင်းကို သေချာပြောပြခဲ့ပါတယ်။ အဲဒီမှာနေရတဲ့ဘဝက ကျွန်တော့်အတွက် ပိုကောင်းတဲ့ရွေးချယ်မှုဖြစ်နိုင်တယ်လို့လည်း သူကပြောပါတယ်။ အဲဒီနိုင်ငံရဲ့ရာသီဥတုနဲ့ ယဉ်ကျေးမှုတွေကိုလည်း သူချစ်မြတ်နိုးနေပုံရပါတယ်”

“ပြီးတော့ သူ့အနေနဲ့ ဩစတြေးလျကို စောစောစီးစီးမလာခဲ့မိလို့ နောင်တရတဲ့အကြောင်းတွေကိုလည်း ပြောပြခဲ့ပါတယ်။ သူအဲဒီမှာ အရမ်းပျော်နေပါတယ်။ အထူးသဖြင့် ခရစ္မတ်ကာလ ကျွန်တော်ကဒီမှာ ချမ်းအေးပြီး ဆိုးဝါးတဲ့ရာသီဥတုကို ဖြတ်ကျော်နေချိန်မှာ သူက ကမ်းခြေမှာ နေပူဆာလှုံနေတဲ့ဗီဒီယိုတွေ လှမ်းပို့ပါတယ်။ အဲဒါက အရမ်းလှပါတယ်” လို့ပြောကြားခဲ့ပါတယ်။ 

လာမယ့်တနင်္လာနေ့မှာတော့ ယူနိုက်တက်ဟာ ဖူလ်ဟမ်ကို အဝေးကွင်းမှာသွားရောက်ရင်ဆိုင်ရမှာဖြစ်ပြီး အမှတ်ပေးဇယား အဆင့် ၁၃ နေရာကနေ တက်လှမ်းနိုင်ဖို့ နိုင်ပွဲရရှိအောင်စွမ်းဆောင်သွားရမှာဖြစ်ပါတယ်။