ရီးရဲလ်စတား ဘယ်လင်ဟမ်တစ်ယောက် အခုအပတ်ထဲမှာ ပခုံးဒဏ်ရာခွဲစိတ်မှာဖြစ်ပြီး လပေါင်းများစွာနားရနိုင်တယ်လို့ သိရပါတယ်။ မေလတုန်းက အဆိုပါဒဏ်ရာအခြေအနေကို ခွဲစိတ်မယ်လို့ အတည်ပြုခဲ့တာဖြစ်ပြီး ကလပ်ကမ္ဘာ့ဖလားအပြီးမှာ လုပ်ဆောင်လာခဲ့တာဖြစ်ပါတယ်။ ၂၀၂၃ တုန်းကတည်းက ဘယ်လင်ဟမ်ဟာ အဆိုပါဒဏ်ရာနဲ့ရုန်းကန်ခဲ့ရတာဖြစ်ပြီး ကလပ်အသင်းအတွက်ကော နိုင်ငံအသင်းအတွက်ပါ ကစားပေးချိန်မှာ ပခုံးအကာအကွယ်ဝတ်ဆင်ကစားခဲ့ရပါတယ်။

ခွဲစိတ်မှုတွေက ချန်ပီယံလိဂ် ၊ ယူရို ၂၀၂၄ နဲ့ ကလပ်ကမ္ဘာ့ဖလားတွေကြောင့် နောက်ကျခဲ့ပြီး အခုနွေရာသီမှာတော့ ခွဲစိတ်မှုခံယူရတော့မှာဖြစ်ပါတယ်။ “ကျွန်တော် ပခုံးအကာကို စိတ်ပျက်နေတာကြာပါပြီ။ အခုတော့ ကျွန်တော်လွတ်လွတ်လပ်လပ်ဖြစ်ပါတော့မယ်”လို့ အသက် ၂၂ နှစ်သားက ပြီးခဲ့တဲ့လတုန်းက ပြောကြားခဲ့ပါတယ်။

စပေါ့တ်သတင်းဌာနကတော့ ဘယ်လင်ဟမ်အနေနဲ့ ခွဲစိတ်မှုခံယူပြီးရင် အောက်တိုဘာလလယ်လောက်အထိ နားရနိုင်တယ်လို့ ဖော်ပြခဲ့ပါတယ်။ တကယ်လို့ ခွဲစိတ်မှုတွေက အဆင်ပြေခဲ့တယ်ဆိုရင် ၃ လလောက်အချိန်ယူရနိုင်ပြီး အများဆုံး ၄ လလောက်အထိ ဖြစ်လာနိုင်ချေရှိနေပါတယ်။

ဆိုလိုတာက ဘယ်လင်ဟမ်အနေနဲ့ အနည်းဆုံးနိုဝင်ဘာလောက်အထိ နားရနိုင်တယ်လို့ သိရပါတယ်။ အင်္ဂလန်သားဟာ လာလီဂါ ၈ ပွဲ ၊ ချန်ပီယံလိဂ် ၂ ပွဲ နဲ့ နိုင်ငံအသင်းပွဲစဉ် ၂ ပွဲလောက်အထိ လွဲချော်နိုင်တာဖြစ်ပါတယ်။ ကနဦးခွဲစိတ်မှုအရ ဘယ်လင်ဟမ်အနေနဲ့ ပခုံးအခြေအနေအတွက် ၁ လလောက်နားရနိုင်ပြီး သူ့လက်မောင်းအတွက်တော့ ပြန်လည်ကုသမှုအချိန်ယူရမှာဖြစ်ပါတယ်။