ဘာစီလိုနာနဲ့ စပိန်လက်ရွေးစင်ကွင်းလယ်လူ ပီဒရီဟာ တနင်္လာနေ့နံနက်ကနယ်သာလန်နဲ့ ယှဉ်ပြိုင်ခဲ့တဲ့ နေရှင်းလိဂ်ကွာတားဖိုင်နယ် ဒုတိယအကျော့ပွဲစဉ်မှာ အသင်းအား နောက်တစ်ဆင့်သို့ပို့ဆောင်နိုင်မယ့် အဆုံးအဖြတ်ပင်နယ်တီကို သွင်းယူခဲ့ပြီးနောက် ပွဲအပြီးမှာ ဘယ်အသင်းကိုမှကြောက်ရွံ့ခြင်းမရှိကြောင်း အခိုင်အမာပြောကြားလာခဲ့ပါတယ်။ 

ယခုပွဲစဉ်မှာ ပီဒရီဟာ ပွဲကစားချိန် ၈၄ မိနစ်ရောက်မှသာ လူစားဝင်ကစားသမားအဖြစ် ဝင်ရောက်ကစားခဲ့တာဖြစ်ပြီး အရေးကြီးတဲ့ပင်နယ်တီသွင်းဂိုးကို သွင်းယူပေးနိုင်ခဲ့တာဖြစ်ပါတယ်။ ပွဲအပြီးမှာတော့ ကွင်းလယ်လူက "ဒီပွဲက အရမ်းကောင်းပါတယ်။ ဒီအသင်းရဲ့အင်္ကျီကိုဝတ်ဆင်ပြီးကစားရတဲ့အတွက်လည်း အရမ်းကောင်းပါတယ်။ ပြီးတော့ ဂိုးသွင်းရတာရောပေါ့။ နောက်တစ်ဆင့်ကိုတက်ရောက်နိုင်လို့ အရမ်းဝမ်းသာပါတယ်"

"ခက်ခဲတဲ့ပွဲစဉ်တစ်ပွဲဖြစ်ခဲ့ပါတယ်။ နယ်သာလန်ကအရမ်းကောင်းတဲ့အသင်းပါ။ သူတို့ရဲ့ကစားပုံက မထင်မှတ်ထားလောက်အောင်ကောင်းပါတယ်။ ကျွန်တော်တို့ ပုံစံကောင်းနဲ့စတင်နိုင်ခဲ့ပေမယ့် ပင်နယ်တီအဆုံးအဖြတ် ခံယူခဲ့ရပါတယ်။ ဒီအဆင့်ကိုကျော်ဖြတ်နိုင်မယ်လို့ ကျွန်တော်တို့ယုံကြည်ခဲ့ပါတယ်" "ပရိသတ်တွေကလည်း ကျွန်တော့်အတွက် အားရစရာပါပဲ။ ယူရိုဖလားကိုဆွတ်ခူးနိုင်ခဲ့တာက ပရိသတ်တွေအတွက်ရော၊ ကျွန်တော်တို့အတွက်ပါ အရမ်းပျော်စရာကောင်းခဲ့ပါတယ်။ သူတို့ရဲ့အားပေးမှုအတွက် ဝမ်းသာပါတယ်။ ပရိသတ်တွေအနေနဲ့လည်း အသင်းရဲ့စွမ်းဆောင်ရည်အပေါ် အားရကျေနပ်မယ်လို့ ယုံကြည်ပါတယ်။ ကျွန်တော်တို့က စပိန်တွေပါ။ ဘယ်သူ့ကိုမှမကြောက်ပါဘူး။ အသင်းတိုင်းကို ကျော်ဖြတ်သွားပါမယ်" လို့ပြောကြားခဲ့ပါတယ်။ 

နေရှင်းလိဂ်ဆီမီးဖိုင်နယ်အဆင့်မှာတော့ စပိန်ဟာ ပြင်သစ်နဲ့ထိပ်တိုက်တွေ့ဆုံသွားမှာဖြစ်ပါတယ်။ ပြင်သစ်အသင်းကလည်း ကွာတားဖိုင်နယ်အဆင့်မှာ ခရိုအေးရှားကိုကျော်ြဖတ်နိုင်ဖို့အတွက် ပင်နယ်တီအဆုံးအဖြတ်ခံယူခဲ့ရပါသေးတယ်။