တော့တင်ဟမ်အသင်းက နယူးကာဆယ်ကွင်းလယ်လူ ဆန်ဒရိုတိုနာလီကို ကလပ်စံချိန်တင်ပြောင်းရွှေ့ကြေးနဲ့ခေါ်ယူဖို့သဘောတူညီမှုရခဲ့ပြီလို့ သိရပါတယ်။

နည်းပြရော်ဘတ်တိုဒီဇာဘီအသင်းက ဒီနှစ်နွေရာသီ အပြောင်းအရွှေ့မှာ အတော်လေး အလုပ်များနေပြီး ဂျန်ပေါလ်ဗန်ဟက်ကီ၊ မားကို့စ်ဆီနီစီတို့ကို ခေါ်ယူထားသလို မားသီးယက်စ်ဖာနန်ဒက်စ်ကိုလည်း ပေါင် ၈၅ သန်းနဲ့ ခေါ်ယူဖို့ သဘောတူညီမှု ရရှိထားပါတယ်။

အီတလီလက်ရွေးစင်တိုနာလီအတွက် တော့တင်ဟမ်အသင်းက ကနဦးပြောင်းရွှေ့ကြေး ပေါင် ၉၂.၅ သန်း ပေးချေရမှာဖြစ်ပြီး၊ ချန်ပီယံလိဂ်ဝင်ခွင့်ရရှိမှုအပေါ် မူတည်ပြီး နောက်ထပ် ပေါင် ၇.၅ သန်း ထပ်တိုးပေးရမယ့် အချက်လည်း ပါဝင်ပါတယ်။

တိုနာလီက အေစီမီလန်ကနေ နယူးကာဆယ်ကို ရောက်လာကတည်းက အသင်းရဲ့ အဓိက ကစားသမား ဖြစ်ခဲ့ပြီး ယမန်နှစ်ရာသီက ပြိုင်ပွဲစုံ ၅၃ ပွဲ ကစားကာ ၃ ဂိုး သွင်းယူပေးထားပါတယ်။

အက်ဒီဟိုဝီရဲ့ နယူးကာဆယ်အသင်းက ပရီးမီးယားလိဂ်မှာ အဆင့် ၁၂ နဲ့ရာသီပိတ်သိမ်းခဲ့တာကြောင့် ဘဏ္ဍာရေးစည်းမျဉ်းတွေ ကိုက်ညီမှုရှိစေဖို့အတွက် အဓိက ကစားသမားတွေကို မဖြစ်မနေ ရောင်းထုတ်ရမယ့် အခြေအနေနဲ့ ရင်ဆိုင်နေရပါတယ်။