မန်ချက်စတာယူနိုက်တက် နောက်ခံလူဟောင်း ဝက်စ်ဘရောင်းက အင်္ဂလန်အသင်းရဲ့ ခံစစ်ပိုင်းမှာ ထရန့် အလက်ဇန်းဒါးအာနိုးကို လိုအပ်နေတယ်လို့ ပြောကြားလိုက်ပါတယ်။

အင်္ဂလန်နောက်ခံလူ တီနို လီဗရာမန်တိုဟာ ဒီလအစောပိုင်းမှာ ကမ္ဘာ့ဖလားလူစာရင်းကနေ နုတ်ထွက်ခဲ့ရပြီးနောက် ခွဲစိတ်ကုသမှု ခံယူခဲ့ရပါတယ်။

နယူးကာဆယ်ကြယ်ပွင့်ရဲ့နေရာမှာ ထရီဗာ ချာလိုဗာနဲ့ အစားထိုးခဲ့ပြီး၊ ရိစ်ဂျိမ်းစ်က ညာနောက်ခံလူနေရာမှာ ဝင်ကစားခဲ့ပေမဲ့ အင်္ဂါနေ့က ဂါနာနဲ့ သုည-သုည သရေကျခဲ့တဲ့ပွဲမှာ ပေါင်နောက်ကြောဒဏ်ရာ ရရှိခဲ့ပါတယ်။ ပနားမားနဲ့ပွဲမှာ ဒဏ်ရာရပြီး လူစားလဲခဲ့ရတဲ့ ဂျိမ်းစ်ရဲ့နေရာမှာတော့ ဂျာရယ် ကွမ်ဆာက ဝင်ကစားပေးခဲ့ရပါတယ်။

အခြေအနေတွေက ဒီလိုဖြစ်နေပေမဲ့လည်း နည်းပြ သောမတ်စ်တူဟယ်လ်က အလက်ဇန်းဒါးအာနိုးကို ခေါ်ယူခဲ့ခြင်း မရှိပါဘူး။ ဂျာမန်နည်းပြအနေနဲ့ အာနိုးရဲ့ ဖန်တီးနိုင်စွမ်းတွေကို လိုအပ်နေနိုင်တယ်လို့ ဝက်စ်ဘရောင်းက Prime Casino နဲ့ အင်တာဗျူးမှာ ပြောကြားခဲ့ပါတယ်။

"တကယ်တော့ ထရန့်က အသင်းမှာ ရှိနေသင့်တာပါ၊ ဒါပေမဲ့ သူ မပါလာတော့လည်း ဒါကိုပဲ တွေးနေလို့ မထူးတော့ပါဘူး။ အခုလောလောဆယ် အရေးကြီးတာက ဂျိမ်းစ်ရဲ့နေရာမှာ အစားထိုးဖို့ပါပဲ။

သူ့နေရာမှာ တာဝန်ကျေအောင် ကစားပေးနိုင်တဲ့သူ ရှိနိုင်ပေမဲ့ တခြားနေရာတွေမှာတော့ အာနိုးလောက် စွမ်းဆောင်နိုင်မှာ မဟုတ်ပါဘူး။ ဒါဟာ ခက်ခဲတဲ့ကိစ္စပါ၊ ဘာလို့လဲဆိုတော့ ထရန့်ရဲ့ အရည်အသွေးနဲ့ သူ ဘာတွေလုပ်နိုင်တယ်ဆိုတာ ကျွန်တော်တို့ အားလုံး သိကြလို့ပါ။

ခံစစ်ပိုင်းအရ ကြည့်မယ်ဆိုရင်တော့ အစားထိုးနိုင်တဲ့ ကစားသမားတွေ ရှိပါတယ်။ ဒါပေမဲ့ ကျွန်တော်တို့ ကစားတဲ့ပုံစံအရ ပြိုင်ဘက်ခံစစ်ကို ထိုးဖောက်ဖွင့်ထုတ်ပေးနိုင်မယ့်သူလည်း လိုအပ်ပါတယ်။ ထရန့်က အဲဒီအတွက် အသင့်တော်ဆုံးပါပဲ။

ဒါပေမဲ့ တူဟယ်လ်ကတော့ သူ့အယူအဆအတိုင်းပဲ ဆက်သွားပါလိမ့်မယ်။ ဒဏ်ရာပြဿနာဆိုတာ ကြိုတင်ခန့်မှန်းလို့ မရပါဘူး။ ဒါဟာ သူရွေးချယ်ထားတဲ့ အသင်းဖြစ်တဲ့အတွက် သူရွေးထားတဲ့အတိုင်းပဲ ဆက်သွားမှာပါ။ ဒါဟာ သူ့ရဲ့ ရွေးချယ်မှုဖြစ်လို့ လက်ခံရမှာပါ" လို့ ၎င်းက ဆိုပါတယ်။

အလက်ဇန်းဒါးအာနိုးဟာ ၂၀၂၅ ခုနှစ်၊ ဇွန်လမှာ နောက်ဆုံးအကြိမ် အင်္ဂလန်အသင်းအတွက် ခေါ်ယူခြင်း ခံခဲ့ရတာပါ။ အခုအခါ ညာနောက်ခံလူနေရာမှာ ဒဏ်ရာရသူတွေ များနေပေမဲ့ တူဟယ်လ်ဆီက ဖိတ်ခေါ်မှု မရရှိသေးတာကြောင့် ဒီနွေရာသီ ပြိုင်ပွဲမှာ သူ ပါဝင်ခွင့်ရဖို့ မသေချာတော့ပါဘူး။