စပိန်တိုက်စစ်မှူးအိုယာဇာဘယ်လ်က ခန္ဓာကိုယ်ပိုင်းနာကျင်ကိုက်ခဲမှု ရှိနေပေမဲ့ စိတ်ဓါတ်ပိုင်းတည်ငြိမ်မှုနဲ့အတူ အနားယူဖို့ ဆန္ဒမရှိဘဲ လာမယ့်ဥရုဂွေးနဲ့ပွဲစဉ်မှာ သူ့ရဲ့အသင်းဖော်ယာမယ်လ်ကိုယ်တိုင် ပြိုင်ဘက်ကို ဖိအားပေးသွားလိမ့်မယ်လို့ ယုံကြည်နေပါတယ်။

ဆော်ဒီအာရေဗျကို ၄-၀ ဂိုးနဲ့ အနိုင်ရရှိခဲ့တဲ့ တနင်္ဂနွေနေ့ပွဲစဉ်မှာ နှစ်ဂိုးသွင်းယူကာ ယာမယ်လ်အတွက် ဂိုးဖန်တီးပေးခဲ့တဲ့ အိုယာဇာဘယ်လ်က ဥရုဂွေးနဲ့ရင်ဆိုင်ရမယ့် အုပ်စုအပိတ်ပွဲစဉ်မတိုင်ခင် မီဒီယာတွေနဲ့တွေ့ဆုံခဲ့ပြီး ခံစားနေရတဲ့ ကိုယ်ခန္ဓာနာကျင်မှုတွေကြောင့် ကွင်းပြင်ပမှာ အနားယူသွားဖို့ မရှိဘူးလို့ ပြောကြားခဲ့ပါတယ်။

"ကျွန်တော် အဆင်ပြေပါတယ်၊ နည်းနည်းတော့ နာကျင်နေတာပေါ့ဗျာ။ ဒါပေမဲ့ အခုလို ပြိုင်ပွဲကြီးတွေမှာ ကစားရချိန်တိုင်း လူတိုင်းမှာ ဒဏ်ရာအနည်းငယ်စီ ရှိတတ်ကြတာ သဘာဝကျပါတယ်။ ကျွန်တော် စိတ်အေးအေးထားပြီး ကောင်းမွန်တဲ့ အခြေအနေမှာ ရှိနေပါတယ်" လို့ အင်္ဂါနေ့သတင်းစာရှင်းလင်းပွဲမှာ အိုယာဇာဘယ်လ်က ပြောကြားခဲ့ပါတယ်။

ခေတ္တမျှ စိုးရိမ်ခဲ့ရတဲ့ အခိုက်အတန့် ရှိခဲ့တယ်ဆိုတာကို အိုယာဇာဘယ်လ် ဝန်ခံခဲ့ပေမဲ့ အခုတော့ စိုးရိမ်မှုတွေ လွန်မြောက်သွားခဲ့ပြီလို့ ဆိုပါတယ်။

ဥရုဂွေးနဲ့ပွဲစဉ်မှာ အနားယူသွားမလားလို့ မေးမြန်းရာမှာတော့ အိုယာဇာဘယ်လ်က "ကျွန်တော့်ဘက်ကတော့ ကစားချင်ပါတယ်၊ အဆင်ပြေတယ်လို့ ခံစားရပါတယ်" လို့ ထပ်လောင်း ပြောကြားခဲ့ပါတယ်။

ဒါ့အပြင် အိုယာဇာဘယ်လ်က တောင်အမေရိကအသင်းတွေရဲ့ပုံစံအတိုင်း ကြမ်းတမ်းပြင်းထန်တဲ့ ကစားဟန်မျိုးဖြင့် ဥရုဂွေးအသင်း ယှဉ်ပြိုင်သွားလိမ့်မယ်လို့ မျှော်လင့်ထားပါတယ်။

စပိန်အသင်းအတွက် အခြားအခြေအနေတွေကိုစဉ်းစားပြီး အာရုံပျံ့လွင့်နေမယ့်အစား သူတို့ရဲ့ကိုယ်ပိုင်ခြေစွမ်းအပေါ်မှာသာ အဓိကအာရုံစိုက်ရမယ်လို့ သူက ပြောကြားခဲ့ပေမဲ့ အုပ်စုတွင်းရလဒ်တွေကိုတော့ လျစ်လျူရှုထားလို့ လုံး၀မရဘူးလို့ ဝန်ခံခဲ့ပါတယ်။

စပိန်အသင်းက ဥရုဂွေးကို အနိုင်ရရှိမယ်ဆိုရင် အုပ်စုပထမနေရာဖြင့် ရှုံးထွက်အဆင့်ဆီ တက်လှမ်းနိုင်သလို သရေကျခဲ့မယ်ဆိုရင်တောင် နောက်တစ်ဆင့်တက်ရောက်ဖို့ လုံလောက်တဲ့အခြေအနေမျိုးမှာ ရှိနေပါတယ်။

ဆော်ဒီကို အနိုင်ရရှိခဲ့တဲ့ပွဲစဉ်မှာ ခြေစွမ်းပြသခဲ့လို့ စပိန်ပရိသတ်အကြား လူကြိုက်များမှုမြင့်တက်လာတဲ့ ယာမယ်လ်နဲ့ပတ်သက်လို့လည်း အိုယာဇာဘယ်လ်ဆီ မေးမြန်းခဲ့ပါတယ်။ ဒီမေးခွန်းအတွက် တိုက်စစ်မှူးက အဖြေကို မဖုံးကွယ်ထားခဲ့ပါဘူး။

"ယာမယ်လ်ဆိုတာ လက်ရှိအချိန်၊ ကမ္ဘာပေါ်မှာ ကြီးမားတဲ့ခြားနားမှုတွေ ဖန်တီးပေးနိုင်တဲ့ ကစားသမားတွေအနက် တစ်ဦး ဖြစ်ပါတယ်။ ပြိုင်ဘက်အပေါ် သူ့ရဲ့ဖိအားပေးနှောင့်ယှက်နိုင်စွမ်းကို ပိုင်ဆိုင်ထားတာ ကျွန်တော်တို့အသင်းအတွက် အကျိုးရှိစေပါတယ်" လို့ အိုယာဇာဘယ်လ်က ပြောကြားခဲ့ပါတယ်။

လတ်တလောမှာ စပိန်က ဥရုဂွေး၊ ကိတ်ဗာဒီတို့ထက် နှစ်မှတ်အသာ၊ ရမှတ်လေးမှတ်ဖြင့် အုပ်စု(H)ရဲ့ အုပ်စုဗိုလ်အဖြစ် ရပ်တည်နေပါတယ်။ လာမယ့်ပွဲစဉ်မှာ ကိတ်ဗာဒီက အုပ်စုအောက်ဆုံးနေရာရှိ ဆော်ဒီနဲ့ ရင်ဆိုင်ကစားသွားရပါမယ်။