ရီးရဲလ်မက်ဒရစ်ကြယ်ပွင့် ရိုဒရီဂိုဟာ ဆော်ဒီအာရေဗျကလပ် အယ်လ်ဟီလယ်ရဲ့ ကမ္ဘာ့စံချိန်တင် ပြောင်းရွှေ့ကြေးနဲ့ ကမ်းလှမ်းမှုကို ငြင်းပယ်ခဲ့ပြီး ကမ္ဘာ့တန်ကြေးအကြီးဆုံးကစားသမားဆိုတဲ့ ဂုဏ်ပုဒ်ရရှိမယ့်အခွင့်အရေးကို လက်လွှတ်ခဲ့တယ်လို့သိရပါတယ်။ 
အယ်လ်ဟီလယ်ဟာ ရိုဒရီဂိုကိုခေါ်ယူဖို့ ရီးရဲလ်မက်ဒရစ်ထံ ပြောင်းရွှေ့ကြေး ယူရိုသန်း ၃၀၀ နဲ့ကမ်းလှမ်းခဲ့တာဖြစ်ပြီး ကစားသမားဘက်က စောစောစီးစီးပဲ ပယ်ချခဲ့တာဖြစ်ပါတယ်။ ဒါ့အပြင် ဘရာဇီးဟာ တစ်နှစ်လုပ်ခ ယူရိုသန်း ၁၄၀ တန်စာချုပ်ကိုလည်းငြင်းပယ်ခဲ့တာဖြစ်ပြီး ရီးရဲလ်မက်ဒရစ်ကလည်း အသင်းရဲ့ကစားသမားကို လက်လွှတ်ဖို့ ဆန္ဒမရှိဘူးလို့သိရပါတယ်။ 
အယ်လ်ဟီလယ်ဟာ ယခုတစ်ပတ်အတွင်းမှာပဲ အသင်းကနေထွက်ခွာတော့မယ့် တောင်ပံကစားသမား နေမာနေရာမှာ ရိုဒရီဂိုနဲ့အစားထိုးလိုနေတာဖြစ်ပါတယ်။ ရိုဒရီဂိုဟာ လက်ရှိရီးရဲလ်မက်ဒရစ်အသင်းဖော်တွေဖြစ်တဲ့ ဗင်နီစီးယက်စ်၊ ဂျုဒ်ဘယ်လင်ဟမ်နဲ့ ကီလီယန်အမ်ဘာပေတို့လို ပုံရိပ်အလွန်မြင့်မားတဲ့ကစားသမားတစ်ဦးမဟုတ်ပေမယ့် အသင်းရဲ့အောင်မြင်မှုတွေအတွက် အရေးပါတဲ့အခန်းကဏ္ဍနေ ပါဝင်ကစားပေးထားနိုင်တာဖြစ်ပါတယ်။ လွန်ခဲ့တဲ့ ၆ ပတ်အတွင်းမှာလည်း အသက်-၂၄ နှစ်အရွယ်ကစားသမားဟာ ချန်ပီယံလိဂ်ပွဲစဉ် ၂ ပွဲမှာ ၄ ဂိုးအထိသွင်းယူနိုင်ခဲ့သလို၊ လာလီဂါ ပွဲစဉ် ၅ ပွဲမှာလည်း သွင်းဂိုးနဲ့ ဂိုးဖန်တီးမှု ၂ ခုပေါင်း ၈ ကြိမ်အထိပြုလုပ်ထားနိုင်ခဲ့ပါတယ်။ 
ရီးရဲလ်မက်ဒရစ်ကစားတွေရဲ့အပြောင်းအရွှေ့အခြေအနေနဲ့ပတ်သက်ပြီး နည်းပြကားလို့စ်အန်ဆယ်လော့တီက “ကစားသမားတွေရဲ့ အနာဂတ်နဲ့ပတ်သက်ပြီး ကျွန်တော့်အနေနဲ့ ပြောရခက်ပါတယ်။ သူတို့မှာလည်း သူတို့ ကိုယ်ပိုင်ဆုံးဖြတ်ချက်တွေရှိနေလို့ပါ။ အသင်းမှာပျော်နေတဲ့ကစားသမားတွေအများကြီးရှိသလို၊ ခက်ခဲတယ်လို့ထင်ရတဲ့ကစားသမားတွေလည်းရှိပါတယ်။ ကျွန်တော့်အနာဂတ်ကိုတောင် ကျွန်တော်ပြောနိုင်ဖို့ခက်ခဲနေချိန်မှာ သူများတွေအကြောင်းကိုတော့ စဉ်းစားသာကြည့်ပါတော့။ ဒါပေမယ့် ကစားသမားတွေ ကျွန်တော်တို့အသင်းမှာကစားချင်ကြတယ်ဆိုတာတော့ ကျွန်တော်ပြောနိုင်ပါတယ်” လို့ပြောကြားခဲ့ပါတယ်။ 
ဆော်ဒီကလပ်တွေဟာ ရိုဒရီဂိုကိုသာမက ပြီးခဲ့တဲ့ရာသီမှာ ဗင်နီစီးယက်စ်ကိုလည်း စံချိန်တင်ပြောင်းရွှေ့ကြေးနဲ့ခေါ်ယူဖို့ ကြိုးစားခဲ့သေးတာဖြစ်ပါတယ်။ အယ်လ်ဟီလယ်ဟာ ဗင်နီစီးယက်စ်ကိုခေါ်ယူဖို့ ယူရို ၁ ဘီလီယံအထိ ပေးချေဖို့ ကမ်းလှမ်းထားခဲ့ပြီး ကစားသမားကို တစ်နှစ်လုပ်ခ ယူရိုသန်း ၂၀၀ အထိပေးအပ်သွားမယ်လို့ သတင်းတွေထွက်ပေါ်ခဲ့ပါတယ်။