ချန်ပီယံလိဂ်ပြိုင်ပွဲပုံစံသစ်မှာ နိုင်ပွဲနှစ်ပွဲသာရရှိပြီး ရှုံးထွက်အဆင့်တက်လှမ်းနိုင်ဖို့ ရုန်းကန်နေရတဲ့ မန်စီးတီးနည်းပြပက်ဂွါဒီယိုလာအတွက် အားပေးထောက်ခံမှုတွေ လိုအပ်တယ်လို့ ချဲလ်ဆီးနည်းပြ မာရက်စ်ကာက ပြောပါတယ်။
မန်စီးတီးအသင်းက ပြီးခဲ့တဲ့ဗုဒ္ဓဟူးနေ့၊ ချန်ပီယံလိဂ်ပွဲစဉ်မှာ ပီအက်စ်ဂျီကို နှစ်ဂိုးပြတ်ဦးဆောင်ခဲ့ပြီးမှ ၄-၂ ဂိုးဖြင့် ရှုံးနိမ့်ကာ အုပ်စုနောက်ဆုံးပွဲစဉ်မတိုင်ခင် အကြိုရှုံးထွက်အဆင့်ကိုတောင် တက်ရောက်နိုင်ဖို့ မရေမရာအခြေအနေတွေနဲ့ ရင်ဆိုင်လာခဲ့ရပါတယ်။
သောကြာနေ့သတင်းစာရှင်းလင်းပွဲအတွင်း မာရက်စ်ကာက “အခုလိုဆိုးရွားမှုတွေနဲ့ပတ်သက်လို့ ပက်ဂွါဒီယိုလာဆီမှာ လုံလောက်တဲ့သန်မာမှုမျိုးရှိပါတယ်။ ဒါပေမယ့် အခြားသူတွေလိုပဲ အခုလိုအချိန်မျိုးမှာ သူ့အတွက် အားပေးထောက်ခံမှုတွေ လိုအပ်ပါတယ်။ လွန်ခဲ့တဲ့ရှစ်နှစ်(သို့မဟုတ်) ကိုးနှစ်လောက်အထိ သူတို့တွေက ထပ်တန်းအဆင့်မှာပဲ အမြဲတမ်းရှိနေခဲ့ပါတယ်”လို့ ပြောပါတယ်။
မန်စီးတီးအသင်းက ချန်ပီယံလိဂ်အမှတ်ပေးဇယားအဆင့်-၂၅ နေရာမှာ ရှိနေပြီး နောက်တစ်ဆင့်တက်လှမ်းနိုင်ဖို့ အမှတ်ပေးဇယားအဆင့် ၁ မှ ၂၄ အတွင်း ဝင်ရောက်နိုင်ရန် လိုအပ်ပါတယ်။ ပက်ဂွါဒီယိုလာကိုယ်တိုင်လည်း သူ့ရဲ့အောင်မြင်ကျော်ကြားလှတဲ့နည်းပြသက်တမ်းတလျှောက် ချန်ပီယံလိဂ်ရှုံးထွက်အဆင့်နဲ့ ဘယ်တုန်းကမှ မလွဲချော်ခဲ့ဖူးပါဘူး။
ဆက်လက်ပြီး မာရက်စ်ကာက မန်စီးတီးအသင်း ပုံစံကောင်းပျောက်ဆုံးနေပေမယ့် သူတို့အသင်းကို ချဲလ်ဆီးအနေဖြင့် အလွယ်တကူအနိုင်ယူဖို့ဆိုတာ မဖြစ်နိုင်ပါဘူးလို့ ပြောပါတယ်။ ချဲလ်ဆီးကလည်း လတ်တလောခြေချော်မှုတွေနဲ့ရင်ဆိုင်ရကာ ပရီးမီးယားလိဂ်နောက်ဆုံးခြောက်ပွဲမှာ တစ်ပွဲသာ အနိုင်ရရှိခဲ့ပါတယ်။
မာရက်စ်ကာက “ဒီကလပ်အသင်းနဲ့ ဒီကစားသမားတွေဟာ အခက်အခဲတွေနဲ့ရင်ဆိုင်နေရချိန် သူတို့ရဲ့စွမ်းဆောင်ရည်ပိုင်း ဘယ်လောက်အထိကောင်းမွန်နေသလဲဆိုတာ ပြသချင်ကြတယ်။ မန်စီးတီးနဲ့ရင်ဆိုင်ဖို့ အခိုက်အတန့်ကောင်းဆိုတာ တစ်ခုတစ်လေတောင်ရှိမယ်လို့ ကျွန်တော်မထင်ပါဘူး။ 
သူတို့ရင်ဆိုင်နေရတဲ့အခိုက်အတန့်မျိုးမှာ ဆက်လက်ရှင်သန်သွားဖို့ဆိုတာ ဘောလုံးလောကမှာ သာမန်ကိစ္စလိုပါပဲ။ သေချာတာကတော့ သူတို့တွေဟာ ဆုဖလားတွေ ဆွတ်ခူးနိုင်ဖို့ ပြန်လာမယ်ဆိုတာပါပဲ”လို့ ပြောပါတယ်။
မာရက်စ်ကာက ပါးမားနည်းပြအဖြစ် တာဝန်မယူမီ မန်စီးတီးအသင်းမှာ နည်းပြတစ်ဦးအဖြစ် ကာလရှည် တာဝန်ထမ်းဆောင်ခဲ့ဖူးပါတယ်။
သူက အီတလီကလပ်အသင်းမှ ထုတ်ပယ်ခံခဲ့ရပြီးနောက် မန်စီးတီးဆီ ပက်ဂွါဒီယိုလာရဲ့လက်ထောက်အဖြစ် ပြန်ရောက်ရှိလာပြီး အသင်းနဲ့အတူ ၂၀၂၂-၂၀၂၃ ဘောလုံးရာသီ၊ ဆုဖလားသုံးလုံးအောင်ပွဲကို ဆွတ်ခူးနိုင်ခဲ့ပါတယ်။ ဒီအတွက် မာရက်စ်ကာက မန်ချက်စတာအခြေစိုက်ကလပ်ကို လှိုက်လှိုက်လှဲလှဲ ကျေးဇူးတင်ခဲ့ပါတယ်။
မာရက်စ်ကာက “ပက်ဂွါဒီယိုလာနဲ့ရော၊ ကလပ်အသင်းနဲ့ပါ ကျွန်တော့်ရဲ့ဆက်ဆံရေးက အရမ်းကောင်းပါတယ်။ ကျွန်တော့်အပေါ်မှာ ပြသပေးခဲ့တဲ့ ယုံကြည်မှုအတွက်လည်း မန်စီးတီးအသင်းကို အမြဲတမ်းကျေးဇူးတင်နေရပါလိမ့်မယ်။ ဘာကြောင့်လဲဆိုတော့ နှစ်လ၊ သုံးလလောက်အတွင်း အီတလီကလပ်အသင်းတစ်ခုက ကျွန်တော့်ကို ရာထူးမှထုတ်ပယ်လိုက်ချိန်မှာပဲ သူတို့တွေ ကျွန်တော့်ကို ချက်ချင်းပြန်ခေါ်ယူပေးခဲ့လို့ ဖြစ်ပါတယ်”လို့ ပြောပါတယ်။
ဆက်လက်ပြီး မာရက်စ်ကာက မန်စီးတီးနဲ့ရင်ဆိုင်ရမယ့် အခုညပိုင်းပွဲစဉ်ကို ဒဏ်ရာကြောင့် ကွင်းလယ်လူလာဗီယာ လွဲချော်မယ်လို့ အတည်ပြုပေးခဲ့ပါတယ်။ ဒါပေမယ့် ဝုဗ်ကိုအနိုင်ရရှိခဲ့တဲ့ ပွဲစဉ်မှာ မပါဝင်နိုင်ခဲ့တဲ့ အန်ဇိုဖာနန်ဒက်ဇ်နဲ့ ကိုလ်ဝဲတို့ကတော့ မန်စီးတီးနဲ့ပွဲစဉ်မှာ ပါဝင်လာနိုင်ပါတယ်။