ရီးရဲလ်မက်ဒရစ်ဥက္ကဋ္ဌလောင်းရီကွယ်လ်မီးက ပြီးခဲ့တဲ့ရက်သတ္တပတ်အနည်းငယ်အတွင်း ဖြစ်ပေါ်ခဲ့တဲ့ အခြေအနေတွေအပေါ် ပြန်လည်သုံးသပ်ထားမှုကို သူ့ရဲ့လူမှုကွန်ရက်မှတဆင့် ဖော်ပြခဲ့ပါတယ်။

ပြီးခဲ့တဲ့တနင်္ဂနွေနေ့၊ ရီးရဲလ်မက်ဒရစ်ဥက္ကဋ္ဌရွေးကောက်ပွဲမှာ ဖလော်ရင်တီနိုပီရက်ဇ် (အသက် ၇၉ နှစ်) က ဆန္ဒမဲအရေအတွက် ၆၅ ရာခိုင်နှုန်း ရရှိပြီး အင်းနရစ်ရီကွယ်လ်မီး (အသက် ၃၇ နှစ်) ကို အနိုင်ရရှိခဲ့ပါတယ်။ ဒီလိုအခြေအနေတွေကြောင့် ဘယ်သူမဆို စိတ်ပျက်အားလျော့သွားနိုင်ပေမဲ့ ရီကွယ်လ်မီးကတော့ ရှုံးနိမ့်မှုကို ဂုဏ်သိက္ခာရှိရှိလက်ခံခဲ့ပြီး ဒီပြိုင်ဆိုင်မှုရဲ့အပေါင်းလက္ခဏာဆောင်တဲ့ အချက်တွေကိုသာ အာရုံစိုက်ဖို့ ရွေးချယ်ခဲ့ပါတယ်။

"ဒီနေ့မှာ မဲဆွယ်စည်းရုံးမှုတွေပြီးဆုံးသွားခဲ့ပေမဲ့ ဒီထက်မက အရေးကြီးတဲ့အရာတစ်ခု စတင်လာပါပြီ။ ကျွန်တော်တို့တွေ ဖလော်ရင်တီနိုပီရက်ဇ်ကို ဂုဏ်ယူပါကြောင်း ပြောကြားလိုသလို အသင်းဝင်အများစု တောင်းဆိုထားကြတဲ့ ရီးရဲလ်မက်ဒရစ်ရဲ့အနာဂတ်နဲ့ပတ်သက်ပြီး ပွင့်ပွင့်လင်းလင်း ဆွေးနွေးမှုတွေ ပြုလုပ်သွားဖို့ ဖိတ်ခေါ်ချင်ပါတယ်" လို့ ကော့စ် (Cox) မြို့သားက မဲဆွယ်စည်းရုံးစဉ်အတွင်း သုံးနှုန်းခဲ့တဲ့ ပြင်းထန်တဲ့စကားလုံးတွေကို ဘေးဖယ်ကာ ရေးသားခဲ့ပါတယ်။

ဒါ့အပြင် ရီကွယ်လ်မီးက သူ့ကိုထောက်ခံပေးခဲ့တဲ့ ပရိသတ်တွေရဲ့အားပေးမှုကိုလည်း အသိအမှတ်ပြုခဲ့ပါတယ်။

"ကျွန်တော်တို့အပေါ် ယုံကြည်ပေးခဲ့ကြတဲ့ ရီးရဲလ်မက်ဒရစ်ပရိသတ်တွေအားလုံးကို ကျေးဇူးတင်ပါတယ်။ ရက်သတ္တပတ်အနည်းငယ်အတွင်း မျှော်လင့်ချက်တွေနဲ့စတင်ခဲ့တဲ့ ကျွန်တော်တို့ရဲ့ဥက္ကဋ္ဌလောင်းဝင်ရောက်ယှဉ်ပြိုင်မှုက ထောင်ပေါင်းများစွာသောအသင်းဝင်တွေကို စုစည်းပေးနိုင်ခဲ့ပြီး မဲအရေအတွက် ၃၅ ရာခိုင်နှုန်းအထိ ရရှိခဲ့ပါတယ်" လို့ သူက ဆိုပါတယ်။

"ဘယ်သူမှ ငြင်းပယ်လို့မရတဲ့ အမှန်တရားတစ်ခုကို ကျွန်တော်တို့ သက်သေပြနိုင်ခဲ့ပါပြီ။ အဲဒါကတော့ အခြားရွေးချယ်စရာလမ်းကြောင်း ရှိနေတယ်ဆိုတာပါပဲ။ အနာဂတ် ရှိနေပါတယ်။ အသင်းဝင်တွေကို ဗဟိုပြုပြီး တည်ဆောက်ဖို့၊ နားထောင်ပေးဖို့ ကွဲပြားခြားနားတဲ့ နည်းလမ်းတွေ ရှိပါတယ်။ ဒါက ဒီနေရာမှာတင် ပြီးဆုံးသွားတာ မဟုတ်ပါဘူး။ ရီးရဲလ်မက်ဒရစ်အသင်းကို အသင်းဝင်တွေရဲ့လက်ထဲမှာပဲ ရှိနေသင့်တယ်လို့ ယုံကြည်ကြသူတွေရဲ့အသံအဖြစ် ကျွန်တော်တို့ ဆက်လက်ရပ်တည်သွားပါမယ်" လို့ သူက နိဂုံးချုပ်ပြောကြားခဲ့ပါတယ်။